【長腿爸爸】遙遠嘅浪翠園有段悲情（經紀）故事

年輕人，知唔知浪翠園喺邊？喺青山公路深井段是也。山旮旯喎，嘿，97年之前因為有人吹咩近機場、青馬大橋，呎價曾經升至13,000元！之後爆咗煲，幾乎全個屋苑負資產！沙士時呎價更低見2,300元！不過Billy Cool唔係要講浪翠園幾慘，而係想講喺浪翠園發生嘅一件事。

大約4、5年前，有個後生女大學畢業入咗行做地產經紀，一直好勤力搵客，想搵多啲錢去改善家人生活，供埋兩個阿妹讀大學。大約3年前，有一日，阿乖女agent就遇到客人Mr. Mean嚟搵樓，當然即刻好熱心咁問晒Mr. Mean有咩要求。

「我哋呢，一家四口，咁就要3房，起碼800呎，Budget預700萬啦，要全海景。」

嗯，3年前樓價雖然無而家咁高，但都唔稱不上低，要3房，又要夠大，仲要全海景，Budget先預嗰700萬，可以想像到點解Mr. Mean搵樓搵到去浪翠園。

阿乖女agent好努力搵一堆盤畀Mr. Mean睇，都睇咗近10個，Mr. Mean腌腌臢臢地批評，阿乖女agent心諗：「呢單做唔成啦，Mr. Mean咁唔滿意。」

點知隔咗一日，Mr. Mean又call佢，話想睇多一次其中一間，係叫價750萬嘅3房高層單位，阿乖女agent本身都覺得呢間正，真係fit哂Mr. Mean要求，個海景仲好無敵，心諗：「再睇，就即係有機啦，今次再落力啲sell吓先。」

Mr. Mean上到去，喺間屋行過無限咁多個圈，左睇右睇，地板、牆壁、窗門、水龍頭咩都摸哂，仲不斷影相，阿乖女agent就讚吓間屋：「呢度真係keep得好新，個海景好靚呢！」

「都算OK啦。」Mr. Mean笑都唔笑，個樣都幾mean吓，不過都終於承認對間屋有興趣。

「咁Mr. Mean你宜家考慮啲咩呢？」

「價錢啦，如果減到去700萬，我會易啲落決定。」

嘩！都幾獅子開大口，阿乖女agent都好識講嘢：「咁呀，我盡量同業主傾傾，不過銀行估價真係750萬，阿業主無刻意叫高到，未必減到咁多。」

「你未試又點知呢？仲有喺你哋傾緊時，我想安排老婆仔囡一齊嚟睇，都要佢哋鍾意先得。」

OK！阿乖女agent當然會試啦，睇多次咪睇多次，係有心買就得啦。

業主一聽減50萬，立即講：「唔賣！無可能！」

呢個業主本身都nice，但嗰刻業主嬲到差唔多要cut線，乖女agent都講咗好耐先comfort番業主，嚇得佢一額汗，都係等第二日先再講過價。

隔咗一日，Mr. Mean就帶埋老婆仔囡嚟睇樓，原來Mr. Mean的大仔都投身社會工作，細囡讀緊大學，4個成年人好似驗屍官係咁睇間屋，左一言右一句咁挑剔間屋，話牆壁有污漬，又話邊邊塊地板花咗，阿乖女agent心諗：「邊度呀？」差啲要拎放大鏡先見到！果然係一家人，全家視力都咁鬼好！

阿乖女agent心諗：「唔賣就算啦，唔使係咁踩間屋。」

Mr. Mean追問：「減到價嗎？」

「業主一聽減50萬，cut咗我線，佢都企得硬㗎，不如我試下叫佢減幾萬啦，好唔好？」

「唔得！起碼40萬啦，呢度咁鬼偏僻。」

「咁呀，我再試下同業主傾一傾。」

嗰期個市又真係淡啲，阿乖女agent眼見兩個阿妹差唔多要開學，佢都好想做到單生意，所以佢作咗個故仔，決定向友善嘅業主動之以情。

「個客真係好欣賞你個單位，佢覺得750萬係值㗎，不過佢手頭唔夠錢，兩個小朋友仲讀緊書，你知啦，宜家喺香港讀書幾緊張，要參加好多課外活動，又要去學校交流團，吓吓都要用錢。仲要佢老婆呢，係有長期病㗎，工又返唔到，醫藥費都唔少，佢哋先想住入深井，空氣好啲，對佢病情都好啲。當然啦，佢哋慘唔代表你要同情佢哋，真係唔需要嘅。不過呢期個市又係靜咗少少，我知你想快啲賣樓，之後安心移民，但我又未搵到第二個客嚟睇樓，咁不如又問吓如果減40萬得唔得呢？個客賣咗佢老婆結婚時對金鈪同豬牌，好有紀念價值㗎，先多個十萬出嚟咋，佢都有誠意㗎。」

「咁呀，我都好同情佢哋，但係呢，我層樓高位買，我都唔想蝕咁多。嗱，咁啦，一人讓一步，725萬一口價，唔好再講價啦。」

嘩！唔激嬲個業主之餘，仲減到25萬！阿乖女agent抵讚呀！咁佢立即同Mr. Mean報告，Mr. Mean似乎都唔太滿意，喺電話都無話OK，反而話想搵個下午望多次間屋！

咩料呀？睇3次都唔夠？阿乖女agent花盡唇舌減到25萬！阿乖女agent嬲到call咗以前幾個比較有米嘅客，落力sell呢個低過銀行估價嘅筍盤，可惜無客想買……咁努力過都無計，惟有認命，帶住Mr. Mean一家四口睇第4次，今次仲加埋Mr. Mean個老母，真係佢老母呀，阿乖女agent咁乖，點會隨便召喚人哋老母。

5個成年人又上嚟睇，4點幾睇到6點！點解睇咁耐？無嘅，Mr. Mean老母話要睇埋個日落景喎。真係呀，佢老母好嘢呀，確保咗啲子孫有靚景睇。

阿乖女agent好盡力笑笑口，講：「呢個景咩都值啦，725萬真係業主最大讓步！」

Mr. Mean好似想點頭之際，佢老母呀，竟然話：「減多5萬啦！」

吓？吓？吓？你試下去街市同個豬肉佬講價講完又講吖，睇佢攞唔攞把刀劈死你！

阿乖女agent好無奈咁答：「業主上次已經講話725萬一口價。」

「你都識講上次呀嘛，今次還今次嘛。」

阿乖女agent真係好想喊，心諗：「講埋呢次，呢單唔做都罷！」

一聽阿業主溫柔嘅聲線，乖女agent心情都好激動，把聲都震埋：「個客好陰公呀，佢借埋佢阿媽啲棺材本出嚟，宜家先籌到720萬，所以無辦法啦，應該買唔到你個單位，真係唔好意思，麻煩咗你咁耐，好對唔住呀！」

點知業主答：「5萬就算啦，我當做好心啦，你幫我準備合約啦，移民都好多嘢搞，我都唔想成日心掛掛諗住層樓。」

就係咁720萬，前前後後幫個客減30萬！係阿乖女agent入行以嚟減到最多！終於嚟到簽單日，已經叫咗Mr. Mean帶定票，就喺約定時間嘅半個鐘頭前，Mr. Mean衝咗上地產鋪。

阿乖女agent都呆一呆，問：「Mr. Mean咁早呀？業主要半個鐘頭後先到喎，我斟杯水俾你飲吓先。」

「唔使，我係專登早啲上嚟，我係嚟通知你，我要零佣金。」

吓？

「Mr. Mean，我咁樣好難做，因為公司未必俾㗎，因為份佣公司都有份，不如我打個折畀你，咁就易做啲。」

「唔得，要零佣金，一蚊佣都唔俾架啦，我問咗隔離間地產鋪，人哋都話得。」

「但係人哋又無帶過你去睇樓，又無幫你講過價……」

「我唔理，我要零佣金。票，我可以即係俾你，只要你肯零佣金。」

同Mr. Mean交手多次，都知佢真係好mean，mean到無情無義。

「咁你俾啲時間我同經理傾一傾。」

入到經理房，乖女agent喊咁口，一五一十同經理講。

經理聽完，第一句說話就係：「正X街乞衣！」之後出去同Mr. Mean講不如俾個三折佢，點知Mr. Mean堅持零佣金。

經理同乖女agent講：「阿女呀，如果你唔急住要錢，我都支持你唔做呢單。」

「但係，我阿妹要交學費啦……」

「人窮就係志短㗎啦，呢單我批畀你做零佣啦，但係下次唔好再招惹呢啲X街客。」 

簽單之際，乖女agent百般滋味在心頭，含淚完成呢單生意，佢一直記住呢一家人個樣，發誓如果喺其他地方遇到呢一家人，如果換轉到佢做客時，佢一定會搵機會留難呢一家人！乖女agent啲恨意，真係令人感受到佢幾難受。

就係咁，每當我諗起浪翠園，就會聯想到呢個悲情故事。大家以為1%佣好多？以為agent一年做一、兩單就夠開飯？事實上，喺大行做agent，嗰1%佣金係要同公司分拆，agent好多時只收到其中20%左右，即係乖女agent只可以收到業主1%佣金中嘅20%，幫個客減咗30萬！個客一蚊都唔俾agent！

我Billy Cool認為呢種行為非常缺德，如果agent做得唔夠好，可以要求減啲佣去彌補，但係個agent已經做得好好，就唔好虧待人哋。除咗缺德之餘，呢種行為更加非常不智，連當年經驗尚淺嘅乖女agent喺中段都識得嘗試sell俾第二個客，何況係有經驗嘅agent？多生意嘅agent更加不屑做呢種生意！Mr. Mean只係好彩遇唔到有人同佢爭呢個盤。

我Billy Cool點解成日搵到筍盤？因為我從來都會俾足1%地產agent，為咗鼓勵佢哋幫手減到去個目標價，甚至樂意出高少少佣金，等佢哋完全係為我呢個買家利益而工作。所以咁多年嚟，我真係搶到唔少筍盤。

作者：長腿爸爸Billy Cool
　　　人稱工廈界Cool魔，十幾年前買入第一個工廈單位，賺到第一桶金，從此改變對財富嘅睇法：有生意當然要繼續做，但想賺大錢就要有準確嘅投資角度！