【長腿爸爸】巴黎香榭麗舍大道 一街之內見盡貧富懸殊

早前暑假尾，終於可以一家五口一齊去旅行啦！Billy Cool就帶埋老婆同細囡由香港出發，另外兩個喺外國讀書嘅小朋友就直接飛到法國巴黎會合。已經好多年無去巴黎啦，應該有十幾年了，今次嚟到，感覺同十幾年前好唔同。回想以前，Billy Cool記憶中嘅巴黎係安全啲，無咁多人。

以前去巴黎，比較多人會提醒你要小心聖心堂外嘅「手繩黨」，驚你俾人綁住，就即刻要俾啲錢佢哋。但係今次，出發前不斷有朋友叫我小心小偷。就算到法國，我哋成日收到whatsapp溫馨提示。

今次旅程中，為咗一解兩個喺外國讀書嘅小朋友嘅思鄉情緒，特別安排一餐遷就佢哋去食唐餐。餐館係由內地人開，一入去坐低，佢哋就不斷叫我哋要小心，財不可露眼。佢哋仲話，如果係18歲以下嘅小偷，基本上俾人捉到之後都好快放返出嚟，所以見到啲小朋友都唔好鬆懈。於是，Billy Cool真係金睛火眼留意四周環境，保護一家人財物。大概係因為我哋真係非常小心，全程都無俾人偷嘢。

不過，Billy Cool就留意到法國貧富懸殊情況原來真係幾勁。我哋有一日喺香榭麗舍大道遊覽，去遊客必去嘅凱旋門，睇吓宏偉嘅建築物。當然，都有去啲名店，Billy Cool本來諗過買個手袋氹吓老婆，點知一去到間L字頭嘅專門店，老早就有好多人排隊，好多係同胞嚟嘅，睇落好似個個都想入去買番十個八個袋咁，佢哋買袋嘅金額，誇張啲講句，真係隨時喺當地買間屋都仲得。老婆一見咁多人排就耍手擰頭，結果我哋喺外面望吓入去，真係好金碧輝煌，不愧係總店呀。

去唔成L店，Billy Cool提議不如望吓H店啦，平日喺香港見到，一個袋都等於半份首期，呢度個價錢比香港平好多，老婆聽到雙眼即刻發光，點知店員問我哋有無預先register，一望，個個袋都mark住「reserved」，咁大牌，老婆都話唔好再嘥時間睇啲香港都有嘅嘢了。

於是，我哋行吓香榭麗舍大道，睇吓有咩景點，沿途行唔夠一個街口，就至少會見到一個乞兒。後嚟，我哋去餐廳食飯，坐喺外面睇吓街景。一餐飯啫，就已經有幾個衣衫襤褸嘅人走過嚟，唔知講咩，大概係想要錢。因為我哋驚俾咗一個就會有二三四五六多個走過嚟，所以都係耍手擰頭。通常佢哋一見侍應就會行開，到我哋食得七七八八，有個連鞋都無著嘅貌似中東裔男人走過來，手指指桌上一小包薯條，我就表示佢可以拎，佢即刻拎起邊走邊食。坐多一陣，有個著得好單薄嘅小朋友用眼神問我哋有無食物，我就叫阿囡入去餐廳買條法包，交俾嗰個小朋友。阿囡之後嚟忍唔住話：「原本法國都有啲咁窮嘅人。」

明明香榭麗舍大道係一條好風光嘅街道，而且有好多名店，但一街之內，我哋可又會見到巴黎嘅另一端景象，貧富懸殊真係無處不在。其實都無辦法，每個地方都有唔同嘅問題，法國會有難民問題，好多人都解決唔到貧窮、找唔到工作嘅困難，自然就會產生治安問題。就好似香港，有啲人係好有錢，但同一時間，有啲人窮到瞓街。一到深夜，就會發現有啲地方其實有好多露宿者，睇返數據，香港社區組織協會「廿四小時快餐店無家者研究2018」，就發現有384名無家者棲身於24小時營業快餐店，有人稱佢哋為「麥難民」，佢哋俾呢個社會忽略，政府總係鍾意粉飾太平，唔諗辦法去解決深層問題。

Billy Cool趁呢個機會同三個仔女傾吓，希望佢哋會關心社會，要知道社會上有一班基層唔似我哋咁幸運，有屋有車衣食無憂，仲可以去旅行，甚至去外國留學。將來，有能力就要幫吓人，就算好似幫唔到啲咩，都千祈唔好成為欺壓佢哋嘅一份子。雖然個人力量有限，不過如果人人都肯思考多少少做多少少，諗吓點樣幫到基層，情況可能會有所改善呢。

作者：長腿爸爸Billy Cool
　　　人稱工廈界Cool魔，十幾年前買入第一個工廈單位，賺到第一桶金，從此改變對財富嘅睇法：有生意當然要繼續做，但想賺大錢就要有準確嘅投資角度！