【小胖阿七】父母點會想失去孩子？關心坦誠溝通唔可以遲

話說之前趁暑假未完，約咗班有小朋友嘅朋友嚟阿七屋企玩，大家一齊食嘢、打機、玩boardgame，咁就玩咗大半日。有小朋友嘅朋友都唔會玩太夜，晚餐食完先至8點半，大家就已經起身走人。有位朋友就留一留，因為佢太太就生第三個小朋友，佢想加多少少人壽，阿七就順便幫佢處理文件。

人壽相對係較易理解，朋友又唔係第一次買，所以好快簽好文件，同快快講一次啲條款，之後朋友就可以回家，9點搞掂。

正當阿七喺度收好文件時，阿仔就走過嚟問：「Daddy，你唔知一年有幾多學生自殺？」

「吓？」嚇得阿七個心離一離，即刻問：「咦，點解你突然提呢個話題？」

「無呀，我頭先聽到Daddy你講到自殺。」

「哦，我頭先講到其中一個不保事項，基本上，所有人壽保險都有『自殺條款』，就係首年或首兩年自殺，不論神志正常或失常，都唔會得到身故賠償，保險公司只會退還已繳保費。呢個係為咗避免『道德風險』。你頭先聽到呢個，所以就關心『自殺』呢個議題。」

「都係，就嚟開學啦，其實年年一開學，都有見到學生自殺嘅新聞，我今年特別擔心，因為唔好話小朋友啦，好多大人都開始有抑鬱症狀。」

「嗯，你講得啱，你嘅擔心絕對值得社會各界去關心，宜家社會氣氛咁差，好多小朋友都無辦法好好享受應有嘅暑假。」

「頭先Daddy同uncle簽緊保險，我就上網search咗，2018至2019學年就有31個學生自殺，最細得10歲咋。」

「10歲？小學生咋！」

「係呀！睇返政府講咩，都幾冷血吓，Daddy你睇吓。」阿仔遞咗個pad過嚟。

「當時嘅教育局局長吳克儉話大專生在壓力下『有啲唔舒服嘅嘢就頂唔順』，唉，無建設性嘅廢話，仲要令人超反感。」

「咁Daddy覺得問題係咩？」

「嗯，好多喎，香港教育制度一定有份啦，一試定生死。啲學校仲要咁睇重成績，鬥多功課，又太早教過深嘅嘢，如果搞小班教學，老師就可以充分照顧到學生，學校又無咁驚收生不足，咁就唔會有啲惡性競爭。同社會又有關啦，工種同機會比我嗰個年代少啦，咁年輕人咪容易覺得前路不明。仲有家庭都有責任啦，父母係最多時間對住小朋友，有無用心同小朋友溝通呢？阿仔你又覺得呢？」

「我同意呀，我唔明政府點解寧願倒錢落海，都唔放多啲資源喺教育。」

「政府政策呢，我哋暫時都要好無奈地接受。你係個中學生，身邊有好多同齡朋友仔，你覺得普遍有啲咩會困擾你哋，有咩建議俾到家長呢？」

於是，兩仔爺就展開一輪深入嘅「兩代對話」，我話覺得好多嘢都唔係話想爭取就可以得到，但阿仔就話佢同好多同學都覺得唔試過又點知唔得。我再解釋社會好難一時三刻就可以改變，受好多因素制肘，佢就話明白成年人有好多顧慮，但就唔希望我哋作為家長咩事都輕易否定佢哋，例如成日話佢哋俾人洗腦，或者你仲細唔識諗。

好彩嘅係，我同阿仔嘅對話好理性，冇爭執冇對罵，大家都係攞件事出嚟討論。後生呢一代，一出世就識上網，睇到嘅世界同我哋唔同，識嘅嘢可能比大人想像中仲要多。

阿七知道呢篇文章會出現喺「親子頭條」平台，所以好想同各位爸爸媽媽分享：同小朋友溝通真係要放下執著，坦誠同佢哋傾偈，唔好咁多否定、批評、責罵。世界變得好快，快到有時我哋真係跟唔切，我哋絕對需要同小朋友連繫，一齊學習同進步。政見可以唔同，但係永遠唔可以推開我哋嘅小朋友，要隨時喺佢哋身邊關心佢哋。自殺死亡數字只係冷冰冰數字，但係對我哋為人父母，小朋友係有血有肉、會喊會笑嘅寶貝，佢哋有理想、有諗法其實係好事，試吓了解佢哋點解會咁諗，無論意見有幾唔同都好，千祈唔好輕言放棄。

作者：小胖阿七

　　　本地保險業界先驅，40年前入行的首批從業員，見證無數高低起落，由高峰期的月入20萬的中環人，到突然要由零開始call單儲客，唔介意分享經驗，最緊要你哋聽完有錢落袋。