【長腿爸爸】點解人哋廁所唔臭？從廁所講一個地方嘅素質

BillyCool鍾意一家大細去旅行，有好多地方都想去，不過，無論去邊，有一樣嘢永遠都係最大考慮——廁所。唔好睇小呢個生活細節，我每次一提議去啲較落後嘅地方，老婆第一個反應係「啲廁所污唔污糟？」明嘅，女人每日花喺廁所嘅時間肯定比男人多，對廁所要求高少少都好合理。順理成章，老婆最鍾意都係去日本。

之前同老婆、阿囡去廣島食蠔，去到啲小店，BillyCool心諗間店仔咁細，個廁差啲都好合理啦，所以都無咩期望。點知一入去，個廁所雖然係細，但係超乾淨企理！去日本就係咁，啲細節每每令人心悅誠服。至於大型商場，多數廁所仲會有小朋友專用嘅廁格，size啱晒小朋友用，難怪啲一家大細去旅行嘅父母，咁鍾意帶小朋友去日本。酒店仲會用識發熱、有水洗pat pat嘅馬桶，都幾過癮。總括而言，日本廁所大部分都好乾淨同舒服，除咗經常有人清潔之外，最緊要係日本人有好高嘅公民質素，有公德心又有同理心，用嘢都盡量用得小心啲，唔會搞到一塌糊塗就走咗去。

不過你可能唔知，30幾年前嘅日本，公廁一啲都唔乾淨，仲因為欠缺管理而招致旅客惡評，到80年代，日本開始做廁所改善運動，由政府行政部門、企業、市民合作，透過宣傳、教育與改善工程，多年嚟嘅努力，先有今時今日世界首屈一指乾淨嘅日本廁所。

睇番香港，一般大型商場嘅廁所都好乾淨，有啲新商場仲幾有驚喜，好似K11 MUSEA，據聞成個商場入面嘅洗手間，每個都係由唔同設計師設計，真係夠心思。你可能會話，新商場廁所梗係乾淨啦，咁公廁呢？其實有一部分新公廁都好出色，好似北潭涌公廁原來有生物降解技術去淨化污物，大大減少臭味，呢啲設計都好值得同小朋友分享。