尋找失物︳港媽以$8,000重酬搵公仔　大雨下搭巴士遺失至愛：獨一無二取代唔到

每人都有心愛之物，若然遺失的話，願意用多少錢找回？日前一個港媽於乘A33巴士時遺失了一隻BB與自己都最愛的公仔，於是在社交平台發文，願付$8,000港幣作重酬，希望街坊及大眾可幫手找回！

一個港媽於4月21日早上於屯門碼頭湖畔樓步行至A33巴士站，乘坐9:10班次的巴士，然後於黃金海岸落車。其時風雨交加，她既要孭奶粉袋，亦要抱BB上車，所以遺失了一隻「豬仔」毛公仔。

重酬$8,000願有人尋獲歸還

該媽媽於社交平台發文，指自己發現遺失公仔後已立即搭的士回湖畔樓找尋，亦沿路找、找車長幫手、甚至摷垃圾桶…她亦已報失，但至今仍未找到，直言「小朋友好鍾意佢，無左佢會喊得好淒涼」。

公仔伴媽媽十幾年　亦是BB至愛

有網民勸她放棄，但也有其他人表示支持。媽媽亦寫道「可能大家覺得用$8,000搵一隻公仔好傻豬，但係我自己本人絕對覺得值得」又於留言補充，指這隻「豬仔」「有十幾年（歷史）」、「以前我帶埋佢去旅行，直到小朋友出左世，就俾佢，佢好鍾意」，並感謝支持及鼓勵她的網友，讓她覺得感動。