老公請纓頂夜更竟同bb玩到凌晨　被江若琳發現：不要獨留先生照顧孩子

江若琳與丈夫蕭唯展的兒子Owen於今年6月出世，Elanne不時都會在社交平台上分享育兒生活點滴。早前，她發文表示老公Oscar請纓「返夜更」照顧兒子，最後Elanne發現他把囑咐拋之腦後，同BB玩到凌晨更笑到卡卡聲，令她下了「不要獨留先生照顧孩子」的結論，更笑言「佢（Oscar）已經俾我解僱左(咗)啦！」

Elanne表示，Oscar留意到她的狀態不佳，主動提出幫忙頂替「夜更」照顧Oscar，「我深感安慰。因為終於可以訓一覺！直頭想yeah出聲！先生好有人性！」

在睡覺前，Elanne亦有叮囑丈夫「bb12:45am飲完奶，佢可以瞓6個鐘，你起碼6點後先俾奶佢飲，因為佢戒左夜奶了！」、「如果佢郁嚟郁去，俾個奶嘴佢，拍返佢瞓、抱下佢，佢就訓返架啦」及「冷氣向下吹，唔好吹住佢個頭，佢會訓得好好。」

當時Oscar表示明白，更指任務十分簡單，讓妻子安心睡覺。不過Elanne在凌晨4點半聽到BB房間傳來笑聲，疑惑前去查看時「眼前畫面震撼了我！」

「先生開緊電話睇住波，bb喺佢旁邊玩樂得相當愉快，兩個大聲講大聲笑，bb笑到卡卡聲！然後我見到有支奶！我問佢：『咩嚟㗎？？做咩呀你？佢話bb 3:00郁呀 佢餓呀！what!!!!!!!!!!!!

再望下嗰冷氣，點解向上嘅？佢話：『因為吹住我個頭』ok 5:00 我望住一路對住我狂笑既bb，於是我叫我先生：『呢度無你嘅事啦，返去瞓啦。』再見！故事 完！」

最終Elanne表示：「可憐的母親望住100%醒晒嘅bb欲哭無淚」

Elanne的經歷引起眾多媽媽的共鳴，「老公湊B，生存便好了。」、「爸媽真偉大」、「單睇文字已經感受到你嘅情緒爆發。你先生始終經驗唔夠，互相體諒吧。」、「爸爸好搞笑，不過都ok啦，BB冇扭計喊，已經好叻」

而Oscar亦在貼文下留言笑稱「下次叫佢唔好笑得咁大聲嘈住你瞓覺」，令Elanne也忍不住指「佢已經俾我解僱咗啦！」