【最後今日】青衣戲棚有得玩有得食

如果今晚收工後有時間，就不妨帶埋小朋友入去走返轉啦！既可以畀小朋友認識傳統文化，又有不同的傳統食品及平時少見的特式玩意，仲有大量不同的大排檔，大人細路都啱玩架！

戲棚內會上演傳統粵劇。

呢個吹糖玩意係必玩的，雖然已經加價去到HK$12一次。(我以前玩果陣只係HK$5一次架咋)

糖漿有四色選擇，唔同色有少少唔同味！

咁點玩呢？畀錢之後，就同伯伯講要咩色！伯伯就會攪勻啲糖漿，而糖漿係暖暖哋嘅。

然後伯伯就會剪出一條長狀類似氣球嘅糖畀你，呢個時候你要快速吹大個糖，將佢變成球體。

見唔見到圖入面個銀色圈圈，只要你吹出嚟果個波波糖大過呢個銀圈，咁就會有大獎。大獎係伯伯手製好精美又有造型嘅糖果棒。

不過就算你吹爆咗個糖或者吹得太細唔合格，伯伯都會送返支細嘅棒棒糖畀你做安慰獎，小朋友就唔會失望啦。

現場仲有好多懷舊小食，例如冰糖葫蘆。

又有泰式手制雪條，天氣咁熱食返支雪條就最爽啦。

仲有好多唔同嘅大排檔小食。

提提大家，雖然人多擠迫，經昨日紅雨一役後，現場唔少地方都有積水、泥濘，帶同小朋友前往必須要小心留意。