【珍寶豬欄】你叫乜名呀？

隔咗陣，阿仔一個人行到嚟登記處⋯嗯，係齋棟咗喺度。

我：登記呀？睇過未？

仔：⋯（毫無反應）

我：係咪未睇過？

仔：⋯（都係冇反應）

我：⋯

坐喺老連咁遙遠嘅媽嗌過嚟：同姑娘講登記呀！

仔聳聳肩，戚戚眉頭打個眼色俾我。

我夠知你要登記啦，你用眼神挑逗我冇用㗎喎⋯

我：你叫乜名呀？睇過㗎啦？登記電話號碼幾多號呀？

仔：⋯

我望向老連老母方向，企圖獲得拯救，仔呀仔，你行開啲得唔得呀？家陣困 lift 咩？得正正企喺度，乜都唔駛做咁款。

終於俾我搵到個靚位望到老連老母，我嗌過去：太太呀？佢睇過未㗎？有冇覆診卡或者登記電話號碼俾到我？

老連老母同仔講：同姑娘講你叫乜名呀？講俾姑娘知屋企電話幾多號呀！

⋯我好乞你憎頂啦，你咁拒絕同我直接對話。

仔：⋯

我交岀紙同筆：你唔講我知，不如寫俾我呀～

仔拎住枝筆同紙行返去老連度，老連又望住我：姑娘，佢睇過㗎喎！

我：咁你寫低佢名同登記電話號碼俾我呀，我check吓～

老連唔知同阿仔講咗乜，阿仔又回來企咗喺我眼前，我望住佢擺低俾我嘅紙⋯

空白嘅？係咪要燒吓定潑水先睇到嘅神奇筆跡嚟㗎？

我望住仔：冇嘢睇嘅？

仔回眸望老連，老連又大嗌：你自己講俾姑娘知叫乜名呀！咁大個仔怕乜醜？

仔望住我：⋯

我望住仔：⋯

我唔玩啦！都唔好玩嘅！

我望住老連：阿太太呀～醫生就嚟走㗎啦，如果你哋仲係登記唔到嘅話，就要三個鐘後先有得睇㗎啦～或者你哋可以晏啲四點鐘嚟再登記過？我哋今晚收七點半，應該夠時間俾你哋登記。

媽媽終於行（飛身）嚟：哦，XXX（名），電話係XXXXXXXX，住邊度邊度，搵唔搵到呀姑娘？

我安心，媽媽亦安心，仔仔亦放心，我：搵到啦多謝合作。