【珍寶豬欄】八婆！你咁寸？

爸爸拎岀一張醫療卡：「我有醫療卡㗎姑娘～」

我拎起張醫療卡望一望：「張卡唔係小朋友個名㗎喎？」

爸爸：「係呀，係我嚟㗎」

我：「而家係小朋友睇醫生嘛？定係你都睇埋一份呀？」

爸爸：「小朋友睇咋，我唔駛睇呀，淨係假紙寫我名呀～你照用張卡啦！」

我：「唔可以咁用㗎喎，你睇就你用，冇得俾第二個用㗎～」

爸爸變得好激動：「咩嘢第二個呀？我個仔嚟㗎！親生㗎！」

我：「冷靜啲先～張醫療卡淨係可以你用㗎咋，你可以自己打上去醫療卡公司問清楚先嘅～」

爸爸繼續激動：「我個仔咪即係我囉！親生㗎嘛！點算係第二個呀？」

係啦係啦，叻啦，知係親生啦，唔好話我唔俾機會你啦！你哋兩個喺我面前成功合體嘅，我咪當你哋係「一個人」囉～嚟啦～合啦嘛？

我：「你打上去醫療卡公司問清楚先啦～」

爸爸：「問乜呀？我個仔即係我！你照用就得啦！你轉頭開返張假紙俾我得㗎啦！」

我：「用唔落手喎⋯咁樣即係呃保險公司啫？」

爸爸：「係善用，我用唔哂俾啲自己個仔用，冇問題呀！」

我：「真係唔可以咁用㗎，你個仔睇醫生嘅話，我哋會收現金，再開返張收據俾你～」

爸爸：「我冇帶錢喎，係得呢張卡，你收就收，都冇得你揀㗎啦！」

哇，無賴得你呀～

我：「哦，既然係咁，都冇辦法啦。」

爸爸：「你照用啦！」

我：「你呢張公司卡嚟嘅，有哂公司名⋯我打去醫療卡公司通知聲先啦，起碼俾你公司知道你咁善用張公司醫療卡嘛～」

爸爸：「八婆！你咁寸？山水有相逢呀！」

同你好熟呀？搵凌凌漆同你逢啦！