【珍寶豬欄】看我如來神掌

登記後，佢哋搵咗個靚位坐低⋯

小朋友用渴求嘅眼神望住媽媽：「而家坐低咗，係咪可以啦？」

媽媽冇理到佢，繼續㩒自己嘅電話⋯

小朋友拉拉媽媽嘅衫：「你話坐低冇嘢做就可以玩㗎，我而家好悶呀」

媽媽不耐煩：「乜你咁煩㗎，玩少陣唔得咩？」

小朋友：「好悶呀坐喺度！」

媽媽喺手袋入面拎岀一大部平板電腦，小朋友滿意的又喺度㩒㩒篤篤。

大嘅喺度無限loop動新聞，細嘅喺度睇唔知乜卡通，總之大家都同樣開聲睇片鬼殺咁嘈⋯

媽媽唔知係咪因為聽唔清啲八卦新聞，就炳個小朋友：「喂！你細聲啲得唔得呀？你聾㗎？我隻耳仔喺你隔離㗎！」

小朋友太投入喺佢嘅私人影院，完全聽唔入耳，冇理到佢阿媽。

嚟啦！媽媽要爆啦！

媽媽一個如來神掌打飛部平板電腦：「我嗌你細聲啲呀！」

我爭啲忍唔住企喺身拍掌叫好，好彩我受過訓練啫！

可憐的平板應聲倒地，喺地下自轉又自轉⋯

小朋友頭岳岳O哂咀望住憤怒嘅媽媽⋯

媽媽回神後望住部平板電腦，發現自己頭先駛岀咗如來神掌，心知不妙今舖奶哂嘢啦。

媽媽：「你仲唔執返部機？」

小朋友跪地執返部機，電腦面上嘅玻璃裂得好有美感⋯小朋友㩒呀㩒，黑畫面！篤呀篤，黑畫面嘅喂！無奈地望向媽媽⋯

媽媽大聲咆哮：「今個月第幾部呀！？你講呀？今次係第幾次呀？」

呢個問題，要問返施主你自己啦，你講，你今個月施展咗幾多次如來神掌？