【甘寧老師】只言傳沒身教的年代

以前果代年輕人，自我同批判思想都冇依家呢一代咁高。姐係咩意思，姐係你教以前d細路仔一嘅英文係讀「five」佢地有機會就咁一路「five」落去，當有人質疑佢地果陣，更加唔會讓步，堅信媽咪教我嘅係正確！呢種思維都正正解釋到點解咁多無厘頭傳統可以流傳落嚟嘅主因之一。

缺乏反思改進，盲目跟隨，係華人教育一直以嚟嘅問題，今時今日叫仔女盲目咁尊師重道、長幼有序已經行唔通！情況就好似你返工咁，你做嘅野最多，識嘅野最多，老細日日就坐係Office領晒你d功勞，你都唔會服佢。同理，你叫仔女做到尊師重道，而唔證明比仔女睇自己值得尊重，所以咪覺得依家d仔女難教。

而所謂嘅「證明」，簡單d嚟講姐係身教，小至搭地鐵先等人落車，大至做錯事勇於承擔認錯，都係證明緊比仔女睇自己係一個值得學習、尊重嘅對象，但依家嘅父母，就係缺少左證明自己呢一個部分。

一方面摸住仔女嘅頭同佢地講「媽咪只係想你地生活開心。」一方面又瘋狂催谷佢地入名校，上唔係自己興趣嘅「興趣」班，實在令人難以信服，問心，你會唔會聽一個你唔服嘅人教導先？

同年輕人打交道最緊要係講道理，盲目叫佢地跟隨某d規定而比唔出合理原因，只會令佢地更反叛。而年輕一輩嘅尊重大多係擺係心入面同行為上展現，由細到大我仔仔都冇叫過我一聲「媽媽」，取而代之係我地之間嘅獨特稱謂，對我嚟講唔單止唔係唔尊重，相反我覺得咁樣我地之間嘅關係更親切。

年輕一代對形式上嘅禮貌的確係冇咁重視，但佢地著重思維上嘅尊重！

我成日見到一個好搞笑嘅現象，一d中學生家長成日話唔好係仔女面前講粗口，其實意義不大，我保證你仔女係學校一定會接觸，甚至講粗口，重點在於佢地點運用！所以你仔女係屋企一句粗口都唔講，已經係尊重緊家長。

總括嚟講，家長只著重門面上嘅所謂尊重，仔女唔配合或者唔做，好大機會係因為當初家長逼佢地做而比唔出合理原因嘅後果。其實多d留意佢地嘅行為，佢地暗地裹已經尊重緊你！而身為現代家長，都唔應該淨係得把口，做野要證明比上司睇自己係掂係得，教仔亦都一樣！

圖片：網絡