【珍寶豬欄】讀唔成書咪好似你咁囉

媽媽喺囝嘅書包度拎岀一叠書：「趁而家有時間，做緊啲呀，自己揀做邊樣呀？」

囝咳咗幾聲。

媽：「唔好扮哂嘢呀！快啲！」

囝眼神充滿十萬個唔願意：「媽媽，我好唔舒服呀...」

媽憤怒了：「唔好扮嘢呀！多多藉口！」

囝：「媽媽呀...」

坐喺側邊嘅阿叔睇唔過眼出聲：「你個仔都發晒燒就俾佢抖吓啦，做遲陣唔駛死呀？」

『唔駛死呀？唔駛死呀？唔駛死呀？』呢句好似完全挑動到媽媽條三叉大大大刺激神經～

媽媽：「咩嘢唔駛死呀？你知唔知啲佢已經早退咗？會追唔上呀！」

叔叔：「電視都有講讀書不是求分數啦！」

媽媽冷眼上下掃射咗叔叔兩Round：「讀唔成書咪好似你咁囉，可？」

叔叔企起身整理一吓自己件李彩華純白小背心：「你講咩呀？」

媽媽望住囝囝：「阿仔，你記得俾心機讀書呀，如果唔係有眼你睇啦！」

 

哇，呢位太太應該平時係有對探測對方功力嘅Xray眼，睇一睇就直接知道對方身家學歷咁款喎。

叔叔：「你知唔知咩叫人不可貌相呀？」

媽媽：「我知～你著到咁都唔慌係知識份子啦，阿仔，你大個咗都唔好著到咁呀」

囝囝趴咗喺櫈度一副「廢鬼事啋你」樣。

叔叔突然除咗件背心，露出六舊定八舊肌肉：「你當我流呀？」

媽媽9秒9執書包兼拉囝走：「痴線！喺小朋友面前除衫！」

叔叔，你都係著返件衫啦，風口位呀...

圖片:網絡