【日本7-11限定】超好味白蘭地朱古力雪米糍

咁日本7-11就喺12月初推出咗一款日本樂天白蘭地朱古力雪米糍「濃厚生チョコ 芳醇ショコラ」。然後咁啱我又喺上星期飛咗去日本一轉，咁當然就唔好執輸去7仔度搵下有冇啦！登登登櫈！結果係有架！228円（連稅），兌番港幣係10幾蚊，即買！

日本7仔限定「濃厚生チョコ 芳醇ショコラ」，連稅都係228yen咋！好抵！

打開就見到一盒兩粒嘅雪米滋(仲有支叉仔)，朱古力皮糯米滋皮上面有朱古力粉，拮開入面嘅朱古力雪糕中間夾住一層白蘭地朱古力醬。

雖然我哋食果一刻佢已經融融地，拮開時個賣相麻麻地(可以睇番我哋條片)，但個味仲係好正！超香濃朱古力加酒味，甜度適中，食完係絕對唔會有cheap cheap朱古力果種黏喉同甜膩嘅感覺，總之超好味啦！係要encore果隻！

同場仲見到Haagen-Dazs都出咗隻限定雪糕，就梗係順便都買埋試下啦！連稅售449yen。

試完之後，都覺得係好食嘅，綠色雪糕係開心果味，中間夾住士多啤梨醬，不過相比白蘭地朱古力雪米糍，呢款就明顯比下去。

仲有呢款連稅都係75Yen嘅波子汽水味雪條又係正到爆！

75yen咋，即係幾蚊港幣！

一拆袋已經聞到好香波子汽水味，抵食！

至於呢兩款Joel Robuchon士多啤梨同朱古力味嘅雪條都係最新出嘅口味！