【話你知】專家：「幼稚園k1收生『細b』係次選！」

經過同大家理性討論後，我就引申出兩個迷思，到底「細B」真係會比較唔受幼稚園歡迎？同埋讀過N班真係有優勢？

當然如果我再引用自己的親身經歷去論證實在太欠公信力，於是我搵嚟亞加比教育中心校長Samantha，佢協助過無數學生通過面試，對現今幼兒教育了解得十分透徹，依家就等佢幫各位讀者「破迷思」!

「細B」係次選，除非面試突出

Samantha指好多學校都唔鍾意「收細仔」，因為細仔和大仔可以有半年至一年嘅差距，相信父母自己都會覺得，即使係相差一個月，仔女都係有一定有差別嘅。如果細路仔有半年至一年的嘅差別，其實分別可以好大！

係幼稚園立場嚟講，大仔的確比較容易教，而且亦比較容易掌握同溝通，所以好多學校都會將細仔作次選，除非細仔係面試時表現非常突出。

讀過N班更勝一籌

好不幸地，Samantha直言，其實幼稚園的確鍾意收有讀過N班嘅小朋友，因為佢地已經比同齡小朋友早半年至一年返學，比較識規矩，亦會比較少喊同嘈吵！

而且相比起冇讀過N班嘅小朋友，佢地會比較清楚咩係「學習」，相對嚟講，的確比較優秀。

不過大家唔使太灰，上述只係概括情況，講到尾最重要都係面試當日表唔表現得好，比校長見到即使係「細B」都唔會同其他同學出現巨大差距！學校最驚係收「麻煩」同「難湊」嘅家長同學生，所以我講左d咩？大家自己參透下。