【親親大自然】假日湊B野餐去

有一大片地方又可以俾小朋友跑跑跳跳，大人又可以放鬆一下，最好不過就係襯住好天氣，唔落雨嘅時候去野餐同小朋友一齊去玩﹗

今次揀咗位於火炭站附近嘅彭福公園同小朋友一齊去玩。

今日大概11 點就到達目的地，一大片草地再加個細公園，開埋張喺淘寶買嘅大野餐墊，加埋今日嘅好天氣，連BB 都話正。搵咗個好位泊好架BB車，佈好個野餐陣之後，大人開始食野，小朋友就開始玩！

先睇睇帶咗咩去野餐：首先有好多好多嘅水果，包括士多啤梨、藍莓、橙、紅提同青提。

之後就係主食，係本媽媽以後學校旅行時嘅懷舊食物，芝士火腿三明治、菠蘿腸、仲有BB好like 嘅粟米同日本蕃薯。最後就係媽媽們嘅零食同飲品。

到咗一點左右，個大太陽曬住頭頂，熱到出煙，所以通常都會揀樹下面嘅位置，有時會有一陣陣嘅涼風，吹住好舒適。

去野餐唔少得帶bubble去同小朋友一齊玩，吹嘅又有，手動式都有，睇下玩到幾爽。

隔離仲有個公園，小朋友實係衝去玩到夠。

公園隔離有草地，有木凳。見到有大人推住BB車散步、一家大細喺個草地上面踢波都得。

玩到咁上下，又攰又口渴時，公園隔離就有汽水機同廁所名可以買飲品同洗個面。都係2分鐘唔洗就到嘅，好方便！

廁所外面仲有飲水機可以用。

其實呢度仲有好多狗狗出沒，興奮死鍾意狗仔嘅小朋友。

玩足3個幾鐘都夠晒，開始餓，閃人！走嘅時候發現小食車仔，見到串鴨腎又大又香咁，即買黎食。

呢度3串總共$27，鴨腎要$16串，好似貴咗啲。不過都幾好食，佢唔太咸(重口味者可能會覺得淡咗啲)，口感都彈牙，可以一試。

而魚蛋同腸都算幾好，魚蛋唔似啲好重粉嘅魚蛋，仲好有童年時放咗學一大班去食嘢嘅感覺。

最後提一提，選搭港鐵嘅你就要喺火炭站嘅C出口(御龍山出口)，大約行15-20分鐘就會到達目的地架啦！

仲要留意彭福公園嘅開放時間呀﹗

http://charities.hkjc.com/charities/chinese/jc-community-facilities/penfold-park.aspx