【即時生效】上淘寶買嘢無得揀順豐發貨？

事件源於昨日凌晨時分，順豐被指關閉物流追蹤數據接口，隨後中午又再關閉淘寶信息接口，令到買家無法於淘寶查詢物流追蹤，阿里巴巴旗下菜鳥網絡之後發表聲明指為避免商家及消費者損失，緊急建議停止商家使用順豐快遞。順豐物流之後亦發出聲明，指順豐物流拒絕向菜鳥網絡透露客戶資料，之後凌晨就被菜鳥網絡單方面切斷信息接口，導致此次事件發生。

本身淘寶購物時，賣家寄貨後，需要在系統後台輸入發貨資訊並確認已發貨，後台就會自動連接相關物流，令買家可追蹤貨件情況，而信息物流顯示到貨嘅15日後，只要買家並無向淘寶後台申請異議、或買家主動於後台確認收貨，貨款先會轉入賣家戶口。目前，淘寶賣家就指現時已經無辦法發貨畀順豐，除咗因為順豐嘅單號無法追蹤外，更無法點擊選擇順豐發貨，為保障買賣雙方的利益，所有店家已經停用了順豐。由於不是所有快遞都可以寄去香港，加上每間物流公司價格都唔同，事出突然，好多淘寶店家無法及時調整價格；部份以順豐公司做主要物流嘅大型店家，就表示香港買家可能需要自己搵方法轉運喇。

內地好多時傳出快遞喺運送貨物過程中曾被拆開、甚至無故消失等情況。對淘寶買家或賣家而言，順豐物流雖然係最貴嘅物流，但勝在效率同安全有保證，一般店家寄貴重貨物，首選都會是順豐。而家兩間公司搞成咁，淘寶好多賣家都怨聲載道﹗淘寶嘅官方賣家交流區就有賣家話要轉用其他物流方法，好無奈咁話如果唔見咗，就真係只可以自己出錢買多件貨畀個客喇。

雖然話，之前淘寶發貨如果唔經其他方式，直接發港澳地區，一般店家會默認以順豐快遞發貨，不過近年除咗淘寶官方搞起集運系統，香港坊間都越來越多集運公司，可以幫你轉運快遞到香港，所以香港買家就話似乎所受嘅影響不大。

目前順豐受到封殺，未知事件能否盡快可以解決。不過，相信對於香港人購物應該唔會造成太大影響；如果有的話，就建議大家試吓趁呢個機會，試吓用集運啦，既方便又抵玩！