【珍寶豬欄】你唔好下下啄住我喎

媽媽A：「衰仔！同我坐低呀！唔好周圍躝呀！幫人抹地呀你？死返過嚟啦」

A仔拖住B仔：「呀～～嗚～～飛呀～～～」
兩個小朋友就好似兩條海獅咁喺診所地下上滑翔。
媽媽A：「起身呀！咪再玩呀！再玩打死你呀！」
媽媽B：「好啦，夠啦～聽話啦，坐定定等睇醫生啦」
B仔起身行去媽媽B面前：「媽媽」
媽媽B幫B仔整理衣服溫柔地問：「咩事呀？」
B仔：「我唔睇醫生唔食藥得唔得呀」

『呀～～嗚～～飛呀～～～』A仔繼續在滑翔。

媽媽B：「唔得呀，你唔舒服呀，你今朝話唔舒服媽媽先帶你嚟睇醫生嘅」
B仔睇睇在滑翔嘅A仔，同媽媽講：「媽媽，我唔舒服係咪可以唔上堂呀？」
媽媽B：「你已經冇返學啦喎，連彈琴奧數都唔返？」
B仔點點頭。
媽媽B：「你俾個原因我呀？點解唔返呀？」
B仔：「我唔舒服」
媽媽B：「咁一陣入去見醫生要拮針針㗎喎」
B仔面容扭曲：「媽媽，我唔拮針針得唔得呀？」
媽媽B望住我：「你問吓姑娘係咪個個小朋友唔舒服睇醫生都要拮針針呀？唔聽話咋病嘅要拮２枝呀，仲好大枝，你問吓姑娘係咪呀？」

又係我？又入我數？
B仔望住我：「姑娘，係咪真㗎？」

佢嗰對圓圓嘅眼睛配又大又深嘅眼袋眼圈….

我：「我哋唔幫小朋友打針㗎，因為食藥水都一樣，所以唔需要再額外打針」
媽媽B即刻兜：「唔聽話嘅小朋友啲藥水特別苦㗎」
B仔又望我。
我：「哦？冇啲咁嘅事，小朋友嘅藥水有士多啤梨味，甜嘅～」
媽媽B行埋嚟同我講：「我教緊仔，你唔好下下啄住我喎」
我：「你借我把口嚟教，我講事實啫。」

『呀～～嗚～～飛呀～～～』A仔同B仔繼續滑翔。