【又係開倉】其實開倉真係會平咗？

未入到去你就會見到咁嘅樣，好似好抵咁？ 

 係社交網站睇到有童裝大牌的鞋開倉，咁目標就係呢3個大牌子，去睇下有岩就買比呀女。仲約埋朋友第一日開始就黎！本來都好興奮，兩個媽媽推住架BB車，就算落晒大雨、山長水遠都一心去掃平嘢！

先睇下大環境，好多媽媽都特登黎到呢度，揹住小朋友嘅又有、同我一樣推住車上嘅都有。但可能係第一日又落雨啦，所以人流真係唔太多。

係嘅，買夠5對係減$100，但不過最後2個師奶都用唔著。

一到就見到有個爸爸位媽媽細聲講：「喂，無得試架。」聽到我都疑惑咗一下，咁咪去問一問，真係唔可以試架！OMG！坦白講，呢Part 對我黎講已經扣晒分，帶個小朋友黎都係想比佢試一試佢岩SIZE，都希望買到對又合適的。雖然係咁，可能都搵到平靚正? 一於睇下先。

下頁先睇 $120 鞋款。

不過唔緊要，可能人哋有好多正嘢呢！睇睇，呢D就係 $120 的款式，好多涼鞋仔款，不過睇盒就知仲有好多。雖然我就真係睇唔岩，而且唔敢唔試咁買，但大家有著開某些以下牌子的可以睇下有啲咩選擇！睇下你哋岩唔岩......

以下呢對cross得返一對，個媽媽拎住問我抵唔抵買，咁我就話:「如果個女無呢d涼鞋仔，咁都可以買嘅。」因為係幾得意。

以下有皮鞋，係幾cute，但係摸落都唔舒服，又好似好薄咁，又無得試，所以算數。

仲有男款涼鞋嘅。

再睇埋下頁，3個大牌做緊半折！？

大牌半價？！仲要係我目標黎，聽落真係好抵，拿拿聲睇下有咩先！

折完 $164.5。

折完 $149.5。

折完 $224.5。

折完 $159.5。

折完 $234.5。

折完 $229.5。

折完 $175。

睇完之後嘅我真係一額汗！發覺唔係平好多，而且款又唔多……山長水遠，最後咩買唔到。見到有個媽媽仲拎住個好大的藍色環保袋，但只買到一鞋。而我與同行的媽媽就都幾失望，都係牌做半價都要 $160 - $230 呢個價錢，真係唔係平好多。好多連鎖店折完都係咁上下價錢，其實都唔洗特登出到呢面買。

比較一下我早前買比呀女的呢對鞋仔都係 $160 左右，差唔多價，又有得試，而且樓下就有得買！

所以整體黎講，真係麻麻，如果睇中嘅咗某啲貨品嘅媽媽可以一去，但記住只收現金，自備環保袋，仲有係無得試著架！

地址:葵涌貨櫃碼頭路71至75號鐘意恆勝中心12樓1204A室(葵芳地鐵站 C 出口,步行5分鐘)

由6月19日 至 6月24日 (時間：10:00am –07:30pm)

仲有早前比地Facebook誤導咗一下，佢地寫A出口，原來B出口先岩！我同朋友兜咗個勁大個圈先到，呢個開倉真唔容易！