【珍寶豬欄】做白衣天使為理想？

有個男人推門入到嚟：「哎～好在未收啫。姑娘，登記呀」

我：「收咗啦，牌都反埋啊～你四點後嚟啦」

佢：「喂唔好啦，而家先一點，我一陣約咗人呀，睇埋呀」

我：「截咗症㗎啦～」

佢：「喂唔好呀，我好快㗎咋，唔駛一分鐘搞掂啦，嚟呀」

....你快成咁都要周圍講俾人知，呢啲值得炫耀嗎？

我：「你幾快都冇用啊，醫生都走咗啊，要睇醫生嘅四點後再嚟啊～」

佢：「喂呀我知你耍我嘅，醫生肯定仲喺入面嘅，嚟呀睇埋呀，俾幾十秒我就出得嚟啦」

你嘅速度喺度每刻倒數啊陰功，再講落去會唔會一秒即出？

我：「冇呃你㗎～醫生真係走咗啦」

佢：「你哋呢啲招數我成日都聽㗎啦，我明嘅，唔想做呀嘛，準時收工呀嘛，咁借問聲你入行為咩呀？」

人工，出糧，食飯，屙屎。

我好坦白：「人工」

佢：「係囉！為理想呀嘛...(停)人工？」

我點頭：「係呀」

邊個返工為理想呀？快啲搵人拎紅筷子夾佢中指啦！鬼上身呀！

佢：「你做呢行係為人工㗎？好多工都有人工呀，你唔去做？」

我：「冇呀，我一畢業就做咗呢行，咁咪繼續喺呢行做」

佢：「喂呀，呢行唔係你呢啲日日諗住準時收工等出糧嘅人做㗎！你呢度有突發事件，你點呀？」

我：「突發？你算唔算係啊？」

佢：「算呀，我咪就係話我呢啲突發囉，你咁樣都想趕我走嘅，你唔應該做呢行囉，你連幾十秒時間都唔俾我，白咩衣天使呀」

我件衫黑色的。

我：「我肯俾你冇用㗎，醫生走咗我點俾你～你係咪唔走呀？我最多嗌外賣喺度陪你等醫生返嚟啦？你食唔食呀？我嗌茶記～」

佢：「醫生真係唔喺度㗎？」

我：「一早講咗係～我今日食咩飯好呢？」

佢推門離開診所，留低我一個喺度諗食咩好....