【珍寶豬欄】Very Touchwood

我：「太太，你搵緊咩呀？」
佢：「醫生卡片呢？」
我喺枱上拎張卡片：「呢度有～呢張呀」
佢望望卡片，指住診所電話：「呢個電話通㗎可？」

唔通㗎，裝飾嚟㗎，神唔神奇？

我：「開診時間有人聽嘅」

佢：「邊個聽呀？」
我：「我～」

佢露出一臉好嫌惡嘅樣咁望住我～耶～唔好望啦，我紅都面晒啦。得閒CALL我呀～

佢：「醫生唔聽㗎？」

我：「呢個電話我負責聽嘅，平時都係用嚟查詢吓開診時間呀假期呀X光返咗未咁嘅～醫生只會喺診症時同病人對話㗎咋～」
佢：「How can I get his phone number？」
入去抄佢牌呀！勇敢啲！
我：「醫生私人電話唔俾人嘅」
佢：「咁佢要個電話嚟做咩呀？」
你份人真係老土，係要人講到咁白嘅，醫生私人電話係唔俾外人㗎！
我：「佢個私人電話係用嚟同佢啲朋友呀屋企人聯絡嘅」
佢：「咁touchwood我過到日本有咩事？邊個救我？」

你覺得醫生係嗰位一嗌就會從天而降嘅都敏俊嗎？就算係，你都唔係千頌伊吧...呢套鬼片嚟㗎？

我：「咁梗係搵返當地嘅醫生啦～你喺日本，醫生喺香港嘛」

佢：「我唔識講日文㗎」
醫生？你最近有冇睇日本愛情片，學好日文未？唔係ｅ姑ｅ姑呀！妖！
我：「醫生都唔識嘅，不過我相信嗰邊啲醫生係識英文嘅」
佢：「我都唔識英文呀，你俾定醫生電話我呀，有咩事佢至少可以同嗰邊醫生溝通同做埋翻譯，咁我會覺得ＯＫ啲」
原來嗰二百蚊平安藥仲要包埋翻譯...
我：「如果你有咩事嘅話呢..我哋醫生唔會即時幫到你㗎...」
佢：「你講咩呀？我去旅行你咒我有事呀？」
做咩呀做咩做咩突然轉咗風向呀？
佢：「我開開心心出發嘅，你係要講到我有事嘅，我仲點去呀？」
我：「我唔係咁嘅意思呀太太....我....」
佢阻止我繼續講：「你有冇講Touchwood呀？冇呀嘛！即係要我有事？」
我：「...................touch....wood.....」
佢：「OK！Fine啦！I forgive you 啦！」
我：「其實你啲英文咁好...唔怕溝通唔到啦...touchwood...」
佢：「我拎定張卡片啦！到時touchwood有咩嘢嘅，我打過嚟你同我搞掂佢呀」

祝你旅途愉快，平平安安。

Very touchwood呀！