【珍寶豬欄】向前看咪幾好

由登記到行去坐低，媽媽都未曾放低過部電話…
囝囝一粒聲都冇出過，坐喺度等等等。

我：「太太，可以入得去見醫生啦～」
媽媽同囝囝企起身，行呀行呀行，媽媽對眼仍然未離開過部電話。

『嘭！』，佢哋撞上醫生房門了。
即使跌低都仍然電話不離手，高人呀！
媽媽向囝囝咆哮：「你做咩呀？」
囝囝冇出聲。
媽媽：「你唔識開門㗎咩？」
囝囝聲都震埋：「重…」
媽媽：「白痴㗎你！」
囝囝冇出聲。

媽媽將怒火轉移咗俾我，向我咆哮：「你咩人嚟㗎？你唔識開門俾我哋㗎咩？」
我爭啲忍唔住翻白眼：「我哋平時淨係會幫啲行動上有唔方便嘅人開門啊」
媽媽：「你見到我拎住部電話㗎可？」

電話咋嘛？你又唔係拎住個手榴彈？你拎個手榴彈嘅我一腳伸你上火星啦～

我：「電話啫，睇完醫生先再用都得啦～」

媽媽：「而家係你唔開門俾我，搞到我撞到呀！唔係我用電話所以先撞到呀，你搞唔搞得清個問題喺邊呀？」
問題會唔會係你冇眼嘅你冇手嘅。

我：「如果太太你有咩唔方便下次可以直接同我哋講，提早要求我哋開門俾你嘅，因為我哋都係靠目測嚟判斷需唔需要幫佢開門～」
媽媽：「你都白痴㗎！你喺度收得我人工就要做㗎啦！我要你奶，你都要呀！」

奶咩呀？我唔奶你㗎喎～你咁變態迫人奶你呀？
我：「太太，你冷靜啲啦，尊重吓自己啦」

佢應該火遮耳聽錯嘢兼講錯嘢：「我啲咁嘅人駛尊重㗎咩？」

之後佢停頓了，自己推門入醫生房。向前看咪幾好～