【珍寶豬欄】或者有日我哋可以再相遇

尚記得十三天前從別人手中接你回家，十三天後把你交到別人手中，那感覺很不真實。
嗰晚同你插喉灌食後，睇住你安穩舒服的睡覺，我同雞爸快快手落樓食晚飯。回來後，你走了…我抱起你時，身體仍暖，我以為係你瞓得太冧…『小朋友？熱浪？起身啊？』你再冇回應，身體呼吸再沒起伏。雞爸把你放在小盒子內，我坐在一旁，突然聽到你在門口那邊響亮的『喵～』了一聲。我問雞爸『係咪熱浪嗌呀？係咪未死呀佢？』，雞爸再三檢查後擰擰頭。大概係你同我講再見了…熱浪，你好乖啊。老人家成日都講乖嘅有靈性嘅寵物係會唔願意俾主人見到佢死，所以佢哋會揀離家出走或者趁主人唔喺屋企時死…
你走嗰晚，我刪除電話內嘅熱浪夠鐘食奶鬧鐘提示，嗰每隔三小時不分晝夜的提示，係你喺呢頭家出現過最後的證明。家中已沒有你的叫聲，感覺好空洞，原來『多一隻唔多，少一隻好覺』係咁解。你唔舒服睇醫生時，醫生已提醒我奶b係好易走好脆弱。雖然我已做好心理準備，但同時我亦希望有奇蹟出現，就好似糯米雞咁，我希望可以用我嘅努力用我嘅心機補回你一切嘅不可能不完全。
不過現實並冇咁多奇蹟，只有現實嘅生老病死…你嘅離開固然難受，但總要面對總要承認現實中並冇十全十美一帆風順。或者有日我哋可以再相遇，我嘅熱浪仔仔，媽媽會再同你見面的，再見。