【珍寶豬欄】自我中心嘅人唔好養動物

究竟要講幾多次要發生幾多次，啲人先知道住高樓大廈養貓唔裝窗網係極危險嘅事？動物就好似小朋友咁BB咁，佢哋係一張白紙，係唔知道咩叫『危險』，小朋友一直處於一個好奇嘅狀態，因為世上所有嘢都係佢哋第一次見第一次接觸。BB時學行時，佢哋會喺地下周圍爬周圍掂佢範圍內掂到嘅嘢。到再大少少，腳仔更加有力可以企到時，佢哋開始向上摸索，有啲掂到窗望到窗，佢哋會開始沉迷望屋外嘅景物…

你見到一個小朋友企喺窗前，你會驚嗎？你會同人講『我個仔好乖嘅，邊會跳落去呀？你估佢蠢嘅咩？』。蠢嘅唔係你個小朋友，係你，你蠢得好緊要，自私得好緊要。你淨係識用你自己嘅角度諗嘢，既然你咁自我中心，你養自己得啦，唔好養其他啦。

明明可以避免嘅意外，你哋就會用『裝咗窗網屋企冇咁靚呀』，『裝咗窗網開窗咪好煩囉』，『裝窗網唔平喎，好貴喎，自己整我又懶呀』…你要為靚，唔好養動物，因為養咗之後，屋企會好多雜物。你要為輕鬆，唔好養動物，養咗之後，你家務都做多幾轉。你要為慳錢，絕對唔好養動物，因為養動物係必需要錢！自我中心嘅人唔好養動物，淨係養你自己就好了。