【珍寶豬欄】美好回憶一直都會喺度

有啲甚至會話『佢哋死嗰時你咪要傷心好多次囉？』。所有生命都有完結嘅一日，我哋唔係不死身，生死冇辦法由自己控制之下，唯有放下。我曾經養過好多仔仔女女，有好多都已經走晒去玩，而家走剩嘅就係大家見到嘅五貓一狗。但B婆其實都已經唔細～已步入老狗階段。而我都決定咗養埋呢班仔女，我就收手。

如果問我面對佢哋嘅死會唔會傷心，會唔會唔習慣…答案一定會係傷心亦唔習慣。

B婆喺屋企時會好嘈，成日亂吠，佢走咗之後屋企會變到好靜，夜晚瞓覺會冇咗佢陣味，冇咗佢晚晚用腳伸醒我，聽唔到佢扯鼻寒，食嘢時冇咗一對blink blink眼望到實一實。但係有日要離開嘅終需要離開，我比較在乎佢哋喺度嘅時候過得開唔開心食得豐唔豐富瞓得爽唔爽。如果佢哋過得開心過得爽，我已經覺得無悔今生，人都一樣，對自己好對珍惜嘅人好，一齊過得開心就夠啦。命運同生死我哋冇辦法控制同預計，但到面對佢哋離開時，我哋多多少少都可以有啲話事權，俾佢哋走得安心，好好放下，俾佢哋知道即使佢哋走咗，你仍然會過得好食得飽，唔駛佢哋擔心你。軀殼雖已化成灰，但美好嘅回憶一直都會喺度。