【新手爸爸】為囡囡準備百日宴（下）

百日宴當日真係體驗到小朋友對長輩嘅魔力，就算佢笑一笑望一望鏡頭都全場HIGH爆，講幾句BB話大家即刻笑曬，唔講仲以為去左四大天王演唱會。卓欣都好乖交足功課眼仔碌碌同人影相，個個抱佢都無投訴。

後備汽球

呢度俾個貼士大家，買汽球真係要買定啲做後備，唔知係咪因為淘寶貨，吹得太脹一放低就爆。有隻獨角馬汽球，個頭爆到成個中間裂開，不成馬形，結果要「人道毀滅」。況且要預備出席嘅小朋友拿走返屋企玩，為免唔夠分都最好買多一兩個。

兩層蛋糕

至於，蛋榚方面，我地選擇左而家好興嘅兩層蛋榚。記得買之前老婆成日問一層好定兩層好呀？我就好直接咁答佢，如果要買一層的話，咁不如買美Ｘ，Ｘ安娜就算啦。結果就買咗呢個蛋糕喇，價值4位數，值唔值得就睇個人決定喇，我就覺得都可以啦，都分到好多件，味道就算唔錯啦。

得意回禮

回禮方面，除咗利是小小回禮之外，我地仲有一個得意又有代表性嘅禮物俾大家，就係欣欣杯喇。咁啱食正欣欣個名，又啱小朋友回家使用，就算親戚朋友見到都會諗返起欣欣啦。

就係咁一班人度過左一個開心嘅晚上。

而家睇返都覺得百日宴同婚禮差唔多都有好多嘢準備，真心要多謝來賓光臨、朋友們幫手、老婆準備，更加多謝卓欣公主合作。

作者：Davis Papa

 新手爸爸，育有一女，現職電視台導演及網路媒體創作人