【長腿爸爸】準新人世侄想買樓 我話最緊要Location

20190719 10594 k01

Billy Cool投資嘅多數係工廈,對私樓唔算好有心得,不過憑經驗我就同佢分析:「買樓記住三個原則,第一Location,第二都係Location,第三都仲係Location。」

點解Billy Cool覺得買樓位置好緊要?先分享吓有次同班朋友食飯嘅經驗,當時在場個個都係老細,當然老細都有大同細之分,有啲真係好有米,有啲就似早年嘅Billy Cool,捱生捱死先只係好過一般打工仔咁。

有位朋友講佢啱啱買咗隻遊艇,另一位堅有米嘅朋友就話:「我介紹一個遊艇會裡面好senior嘅朋友俾你識呀。」

點知唔知嗰位朋友係咪飲大咗,有啲不屑咁話:「我都有頭有面,使鬼你介紹!」

對方冷冷一句:「有頭有面就唔會住元朗啦。」

全場dead air幾秒,氣氛冷到冰點。嗰位朋友都回應唔到,其他人就拋出其他話題,之後又嘻嘻哈哈,就不了了之。不過喺Billy Cool心裡,一直好記得呢件事,嗰位朋友係有啲無禮貌,但另一位一句就KO佢又真係殘忍咗少少。

當然,元朗有唔少新樓都好靚,價錢都唔平,裡面一定有啲有錢人,不過所謂有錢都分層次,當你見識過有啲人入咗啲乜會勿會,講緊唔係俾幾百萬就入到會,而係要識人,有資深會員介紹先入到,你就會知道咩叫「有頭有面」。

所以,對老闆級嚟講,買樓位置好緊要,佢哋會住喺邊?大概只會揀半山、淺水灣、跑馬地,一講就唔駛解釋,已經凸顯身份。相反,如果你講大角嘴,你要解釋係大角嘴邊個盤,個盤仲要有個豪華名,咁先會有人信你撈得唔錯。虛榮感,無錯,就係虛榮感,尤其是當你身邊嘅人都鍾意比較。

講得遠咗啲,Billy Cool當然唔係叫世侄追求虛榮感,只係想帶出:就算唔關虛榮感事,揀樓嘅location仍然好重要,好簡單嘅一個最基本條件,到日後小朋友要搵學校讀書,如果到時先發覺原來住嗰區嘅校網唔啱心水,咁就有排頭痕。再講,以投資角度去睇,中學經濟課堂都有教demand and supply,多人想要就有需求,當供應係有限嘅時候,咁咪有升值潛力,即係喺經濟低迷時,抗跌能力都強啲,亦都容易放租,所以巿區樓一直搶手。

Billy Cool之前陪朋友去大角嘴睇新盤,900萬先得300呎,地產agent同我們講:「呢度會升值,因為keep住有新盤,大角嘴有好多新發展。」係人都知啦,升係一定會升值嘅,只不過升值幅度係幾多呢?相信都唔夠市區樓升得多,既然供得起900萬嘅樓,我相信總有更好嘅選擇。

講真,香港樓價真係貴到飛起,Billy Cool只能慶幸自己上車上得早,仲睇中唔少投資機會,先至有今日。不得不感慨進入M型社會嘅香港,大家生活越來越艱難,也許要發揮創意,突破框框,先可以搵到適合自己嘅人生。

 

作者:長腿爸爸Billy Cool
   人稱工廈界Cool魔,十幾年前買入第一個工廈單位,賺到第一桶金,從此改變對財富嘅睇法:有生意當然要繼續做,但想賺大錢就要有準確嘅投資角度!

田叔叔英語閱讀計劃2023-24
田叔叔英語閱讀計劃2023-24
 親子最關注
香港優質教育機構巡禮 2024