【珍寶豬欄】隔籬嘅姑娘，到你聽電話啦

對方係一位先生：「我要投訴呀！」

我：「請問先生要投訴啲咩呢？」

佢：「我要投訴你啲姑娘好差呀！」

啊？即係你要我自己處理返自己啲投訴咁呀？好呀，左耳入右耳出啊。

我：「請問係咩事呢？」

佢：「有個死肥婆姑娘呀！」

係我，應該係我。 我：「嗯，繼續呀」

佢：「佢喺度登記嗰時喺我面前食嘢囉，喺我面前扒飯呀！」

印象中…我冇做過啲咁嘅嘢喎，唔通我返工都夢遊？

我：「先生，請問係幾時嘅事呀？」

佢：「就頭先咋嘛！」

咁肯定唔係我啦，我哋晏晝全部姑娘都有出去食飯，又點會喺度扒飯。

我：「唔好意思呀先生，頭先我哋全部人都出咗去食晏喎」

佢：「你係咪乜乜醫生嘅姑娘呀？」

我：「係呀。」

佢：「啱啦！我係要投訴你隔離嗰間乜乜乜醫生嘅姑娘呀！」

我：「隔離姑娘唔關我哋事㗎喎？」

佢：「咩嘢叫唔關你哋事呀？你又係姑娘，佢又係姑娘，一樣呀。」

如果你咁講嘅，全天下老母都係你老母啦。

我：「我哋係兩間唔同嘅診所嚟，唔關事㗎，有咩嘅你自己同返佢哋講啦，我收線啦！」

佢：「喂喂喂？你咪收線住呀！隔離唔關你事呀嘛，我投訴埋你囉！你唔好收線呀！」

我：「嗯，好啦，我接受你嘅投訴啦。」

佢：「我駛咩你接受呀？我打去隔離投訴你呀！」

嘟。我CUT咗佢線。隔籬嘅姑娘，到你聽電話啦～接力啦～

（以上專欄由Dr-Max教材大王全力支持）