【珍寶豬欄】自己嘅生活唔係活俾人睇

睇返以前嘅相，諗返以前佢一定要痴住人捉住人先肯瞓，食嘢狼死到不得了嗰個樣，同而家嘅佢相比起，真係充份證明有家嘅小朋友就係幸福同任性。而家嘅佢已經唔會再次次清碗，亦唔會痴住我先瞓到。咁樣都應該係因為佢已經有足夠嘅安全感～佢知道俾佢日咬夜咬嘅肥婆唔會俾佢餓親之餘，更加係唔會掉佢出街。

早幾日有人問我『雞雞算唔算生命力好強勁？』，我諗都唔駛諗，梗係算啦！我自己三十幾度行出街一陣都想死，佢仲要係三十幾度天氣下冇水冇糧喺個寵物袋入面，咁都唔死得，生命力簡直勁過蚯蚓啦。而且佢細細個嗰時下半身咁嘅樣，到大個都可以成為貓界跑車，呢啲真係除咗生命力改善貓生可以解釋到，我都諗唔到另一個理由。

雖然我都俾人inbox炳過我係換咗N次貓，呢個情況就好似我俾人話我啲返工經歷係老作家一樣，解釋都冇用啦，其他人一口咬定係，無論你點解釋佢哋都一樣唔會聽得入耳，即使有證明，佢哋仍然係不痛不癢咁搵下一樣嘢嚟啄你。

唯有笑笑話『係呀，你真係看透世事啦』，反正本身係各不相干嘅人，何必執著糾纏。

自己嘅生活唔係活俾人睇，最緊要都係自己同班仔女，其他唔關事嘅人…一律都係屋外人～唔俾佢過門就唔係客啦，駛乜招呼佢。

（以上專欄由Dr-Max教材大王全力支持）