【保險經紀】阿七：中環係我嘅天堂，亦係我嘅地獄……

「一切由騙局開始。」當有人問阿七點入行，我就會咁答。當年呢，唔知邊個阿叔個老闆個侄仔就喺保險公司做，話咩好好搵，做到好威咁，要build條全港最大嘅team咁話喎。

一入到去，就要你抄晒全家啲電話號碼出嚟，監住你逐個打去問候，之後就約出嚟飲下茶，之後大佬就會叫你執好建議書，夾住你出去見班鄉紳父老，講到你好上進又有心，實牙實齒一世喺度做，買份人壽啦，保障下屋企人；買份醫保，入院都唔驚；有小朋友就買份儲蓄保，總之咩都保一保。

每個人喺最初入行時，阿大佬都捧到上天咁，好似個個都係百年一遇嘅驚世奇才，不過當你sell晒班親戚之後，大佬就話：「你都見過我點sell啦，你大個仔啦，我信你架，以後你自己做啦！」

Umm，好啦，咁就好多人X街咗囉，無生意無數，自動消失，客同單留晒畀大佬，大佬愈來愈多客，收入愈來愈豐厚，好嘢呀！咁我阿七呢，好彩夠天真，我真係信自己係驚世奇才，咪不斷去搵新客，過時過節就打晒電話畀啲客噓寒問暖，得閒叫啲客介紹下客，又去下商會social下，咁就40年。

大堆客都係我一手一腳搵番嚟㗎，60歲嘅我終於月薪20萬啦！搵到錢嗰期，同得閒就同老婆去IFC國金軒飲松露龍蝦湯、食花膠海參、歎紅酒，透過塊落地玻璃窗望落中環，呢個就係我個中環，嗰一刻，中環簡直係天堂！

不過，原來下一刻，天堂係會變咗地獄！

就係嗰一年，公司被某本地富豪收購咗，富豪為咗做靚條數，一下子就迫走晒我哋呢班老鬼，保險單係帶唔走架！就係咁，公司食晒我啲客，仲有每月20萬嘅收入！計數真係計得盡，抵你做富豪！不過我40年嚟捱生做死嘅成果，咁就一下子無晒。

可能你話我都差唔多到退休年齡，但係衰在我遲婚遲生仔，我個仔先十幾歲，仲讀緊中學，老婆就一直係家庭主婦。阿七作為男人，只好硬住頭皮去搵另一間保險公司收留我，睇下點搵啲生意返嚟啦，真係好似求朋友收留咁，你又帶唔到啲單過嚟，又一把年紀，人哋都驚你係Old Seafood，邊敢亂咁招惹你呀！

中環呀中環，你係我嘅發跡地，亦係我嘅墮落之地！喺度跌低，就要喺度起返身，我係咁教我個仔！一切由零開始，點樣一個一個客咁儲返嚟？我阿七日後再慢慢講啦，順便同大家分享下有關保險嘅嘢。我又夠鐘去見客啦……

作者：小胖阿七

　　　本地保險業界先驅，40年前入行的首批從業員，見證無數高低起落，由高峰期的月入20萬的中環人，到突然要由零開始call單儲客，唔介意分享經驗，最緊要你哋聽完有錢落袋。