【珍寶豬欄】要喊就即管喊

你唔係孤獨一個人嘅，我哋好多人都一樣。要喊就即管喊，唔好收收埋埋，覺得喊係軟弱嘅表現，男定女都係。每個人都有情緒，亦有無力感嘅時候。即使軟弱無力亦唔係羞愧嘅事，我哋係人嘛，唔係超人。面對好多情況，我哋都一樣會冇能力解決，一個人唔得嘅，就試試搵人幫吓手，至少有個照應亦可互相扶持。人生中或多或少都會面對挫折，我哋都會從中學習同成長。

家中班寵物係我嘅精神支柱，我攰嘅時候，會望望佢哋嘅相，睇吓佢哋啲影片。呢個時候會係我心靈上最寧靜，腦袋最放鬆嘅時候，亦係叉電嘅好機會。如果你家中冇寵物就睇吓其他人嘅，寵物天真爛漫嘅笑臉，滑稽逗趣嘅動作，為你提供一息間嘅喘息機會。

覺得唔舒服時，可以暫且抽離一下，冇人會怪你。我哋或者冇辦法一個人堅守到最後，但我哋係一班人，一大班人！一個人暫且離開，其他人自動補上。

就算我哋行唔同嘅路，亦唔需要惡言相向，因為路有好多，世界亦好大。不同路的偶爾相遇，只需點頭示好，然後繼續行自己嘅路。唔好望人哋行嘅係死路，人哋嘅死唔會令你有乜好處，反而會係自己作口業。一生中受嘅挑戰有好多，每次我哋都應該抱住謙卑嘅態度應對，因為對方未必有惡意，只係佢表達嘅方式可能唔係你預期想要。

一齊吸貓吧！

（以上專欄由Dr-Max教材大王全力支持）