【長腿叔叔】揹M Duck袋劏房男　愛上杏花邨複式單位女生

「嘩，阿仔瘦咗喎，你有無食飽㗎？」
「Hi媽咪老豆，我邊有瘦到呀？」
突然，有個金色長髮、好似無咩著衫嘅鬼妹喺阿仔後面飄過，佢阿媽忍唔住尖叫一聲。
「阿仔！邊個嚟㗎？」
「Umm，同學仔一齊溫書啫。」
「同學仔？」
估唔到，真係估唔到，高中嘅大仔果然出色，比我Billy Cool當年出色得多。回想當年，我都自以為厲害，中五開始有拍拖。不過當年都係拖吓手仔，最多攬過吓，點夠阿仔巴閉，帶個身材火辣嘅鬼妹返男生宿舍，出色！

想當年，Billy Cool就讀港島區學校，一間成績都唔錯嘅學校，可以想像啲同學家境都唔太差。我呢？絕對無家底可言，當年同阿爸阿媽一齊住喺北角嘅劏房，嗱，我嗰個年代仲未叫做劏房，叫做板間房，同而家啲劏房差唔多。

20190625 10519 k02

細個嗰時，暗地裡會同啲同學仔比較，唔想俾人知自己屋企窮，所以我幾注重打扮。好似當年好流行嘅M Duck袋，講緊成千蚊一個，仲有Dr.孖田皮鞋，又係近一千蚊對，我靠做part-time派傳單，死慳死抵先買到。揹住個MD20、踩住對Dr.孖，真係覺得自己型到爆。係咁架啦，細個嗰時啲自信係靠身外物支撐住，於是中五嗰年就追到個樣都OK嘅女仔，唔係話好靚，但係望落幾順眼。
呢個女仔係我第一個女朋友，頭髮唔長唔短、戴眼鏡、打扮較樸素，咁樣一比，我成日覺得我一身打扮贏哂，點睇都無得輸。同佢一齊會坐下圖書館溫書，有時請佢去仙X岩飲杯珍珠奶茶，已經自我感覺良好，直至嗰一個星期日……
佢話：「阿爸阿媽去旅行，最煩嗰個工人姐姐出咗中環，你可以上我屋企玩喎。」嗰吓，其實我剩係聽到上佢屋企，都無留意咩阿爸阿媽去旅行同工人姐姐，全個腦真係諗到孤男寡女共處一室，唔知會有啲咩發生。
於是，我懶有型咁故作鎮定上佢屋企。我永遠都記得嗰次搭地鐵去杏花村，明明同北角只係相隔幾個站，唔知點解感覺差咁遠……杏花村好靜局，人同車都唔多，啲樓又唔算好高，全部白色，好清新，樓下個保安著得好整齊，仲好有禮貌。嗰一刻，我覺得同佢嘅距離，這麼近那麼遠。
最最最令我清醒嘅時候，就係佢打開屋企門一刻。嘩，好X大……我講間屋！
係一個複式單位，唔怪之得佢話最煩嗰個工人姐姐出咗中環，原來屋企仲有個最好嘅工人姐姐，呢個工人姐姐仲切水果出嚟俾我哋食。

坐喺佢屋企，成件事好虛幻咁，我成世人未去過咁大嘅屋企，未受過人哋工人姐姐招待過。自從嗰日，我知道自己個世界觀變咗，開始唔明點解之前咁低能，揹個M Duck就自以為型，突然覺得自己真係好無知！

嗰日之後，我好好咁思考將來，我同自己講：就算住唔到複式，我都唔可以再住板間房！嗰時我未知點樣發達，我諗可以做到嘅就係努力讀書。後來呢，我掛住讀書，都無咩同女朋友拍拖，一段感情就不了了之。雖然直到今日，我都未有機會住咁大個單位，但至少有能力養起頭家、供細路去外國讀書、投資物業亦有多少收穫。突然諗起佢，唔知佢而家點樣呢？
「老公老公！你要話吓阿仔啦！」
「吓？咩呀？」
「你個仔呀！」
「哦，仔呀，玩還玩，小心啲就OK，安全第一。」
「知道，老豆，我去溫書先，拜拜。」
阿仔匆匆收線，我就預咗俾老婆話。
「喂！你咁教仔㗎？」
「嗯，算好彩啦，我哋個仔咁生性。」
「你咁都唔話吓佢！」
「佢都讀高中啦，仲要去咗外國，管都管唔到，不如同佢好似朋友咁傾吓偈，好過嚇到佢咩都唔同你講，係咪？」
「……」
「下次你咪問下嗰個係咪佢女朋友囉，都唔好話佢咩喇，你都唔想阿仔唔打電話返嚟㗎？」
我把口講得瀟灑啫，其實我都擔心嘅。我希望阿仔喺玩之餘都好似我當年咁，識得咩叫自知之明，見識到世界之大，就要的起心肝做人，唔好日日只係滿足於一時之快，要俾心機為未來打拼。