【小胖阿七】暴動定恐襲？保險賠唔賠，定義好重要

近來，多咗客人嚟問阿七一啲保險嘅定義，以前呢，通常大家買完保險就好安心，好少咁樣不斷發問，點解啲客好學咗？無法啦，香港越來越多光怪陸離嘅事，搞到人心惶惶、人人自危。

20190820 10689 k01

「阿七呀，我個女呢，都有去示威，如果期間受傷，保險賠唔賠先？」
「問得好呀！我哋慢慢釐清問題先。首先，要視乎你買咗咩保險，如果係人壽，一般都唔保一年內嘅自殺，其餘就算係示威、騷亂、非法活動等等都會包。」
「阿七，乜你一嚟就講人壽，嚇鬼咩？我阿女唔係去衝嗰班最前線，應該都唔會咁嚴重嘅。」
「我唔係想嚇你，不過諗住講個最少爭議嘅保險先，因為最易理解。之後，我哋講危疾，當中都包心臟病、失明、失聰同斷肢。危疾就唔保自殺或自致傷害，所以新聞講嗰位叔父突然心臟病發，如果佢未有心臟病前已買危疾保，咁咪有得賠危疾囉。不過，醫療保同意外保就唔賠俾佢啦，你知唔知點解？」
「佢犯法？」
「如果俾人影到佢打人，或者有證據指佢係犯法，醫療保、意外保，以至旅遊保啲條款，就會有比較多不保事項，一般都會列『恐襲』、『暴動』、『戰爭』、『參與非法活動』等等為不保事項。」
「政府同警方一時又話係『暴動』，一時又話只係少數人先有暴動，咁又點計呀？」
「政府講法較含糊，新聞報道一個港台司機受傷，就係因為政府話係『暴動』而無得索償，政府之後又改口風，咁保險公司又繼續俾佢申請。」
「定義都好緊要喎。」
「係，如果你個女係參與已申請嘅遊行就唔使擔心，因為呢啲係合法活動，期間有啲咩損傷都可以claim醫療保。但係，如果個遊行路線或時間唔係不反對通知書裡面批准嘅，有機會變成『非法集結』，期間有受傷，咁就有爭議啦，保險公司有機會唔賠。」
「如果我只係路過而受傷呢？」
「你無『參與』，應該無咩問題，不過如果件事被定性為『戰爭』或『政變』，咁路過都無得保喇。」
「頭先你話參與合法遊行受傷可以claim醫療保，但你無講意外保嘅？有無得claim呢？」
「心水清呀吓你，因為意外保會有更多爭議，話明係『意外』，即係真係『意料之外』，喺和平合法示威中受傷，參與定路過嘅，正常就claim到意外保。但係，萬一已出現武力衝突，受保人明知有危險都去嗰度，無論參與定路過嘅，有啲保險公司有可能認為唔係『意料之外』，咁就有機會賠唔到。」
「咁都有得拗喎，點證明我係『明知』有危險？」
「嗱，作為agent，我只可以講保單上的字面解釋俾你聽，到最後都係要保險公司索償部審批，我嘅工作係填claim form，仲有問個客拎單據同醫療報告，盡力幫客人申請，之後等保險公司審批。」
「元朗嗰單白衫人打港鐵乘客，政府無話係『恐襲』，咁實有得賠啦。」
「又未必喎，雖然政府無話係『恐襲』，但係呢單嘢，同一般保險公司對『恐怖活動』嘅理解有啲接近喎，因為係『引起公眾恐慌』嘅『暴力行為』，而家都係睇吓啲真實索償情況，等緊保險公司決定，暫時我都答唔到你。」
「都真係幾複雜吓……」
「係呀，唯有盡量保護自己啦！你阿女出去遊行，都要叫佢小心啲呀！」
以上只係一啲概括情況，唔同保單有唔同條款，所以要睇番自己份保單。而唔同保險公司亦會自行詮釋保單條款，所以賠唔賠到，最後都係睇保險公司決定。阿七會繼續密切留意件事，希望大家萬事小心，好好照顧自己，香港人加油！