【小胖阿七】機場有示威令行程有延誤 保險賠唔賠？

最近阿七都收唔少手信──日本、韓國、泰國、歐洲啲零食，因為唔少朋友趁小朋友放暑假，一家大細出外旅行，返嚟分享吓玩咗同食咗咩嘢，一齊睇吓相。

不過，幾多朋友問阿七差唔多嘅假設性問題：「如果咁啱出發嗰日，機場因為有示威而上唔到機，保險賠唔賠？」「如果咁啱返嚟班機取消咗，因而滯留外地，保險賠唔賠？」「自由行去玩同跟團去玩，有無話邊個保險容易賠得到？」

拎咗少少手信，就梗係要解答疑問，阿七今期不如寫一寫旅遊保啦！

嗱，政府一直未搞得掂「反送中」示威，短期內似乎都平息唔到抗爭，之前就有機場示威令到機管局取消咗航班。真係有旅客行程受阻，旅遊保險包唔包呢？首先，老土啲都要講句：各大寶號嘅保單條款都唔同，真係真係真係（重要的事要講3次）要睇清楚自己買咗咩，唔清楚就問返保險公司。阿七可以講嘅只係一般常見嘅保單情況。

如果情況係「行程延誤」或「航班延誤」，多數旅遊保都係以延誤6小時以上為基礎，先至會有賠償，一般如果係因為「暴動」、「騷亂」、「罷工」、「惡劣天氣」等原因而延誤，都有得賠。不過，如果係因為「恐怖活動」、「機場關閉」，就通常無得賠。賠償通常會係現金，主要係補償受保人因延誤而等待期間嘅支出，例如喺機場飲食嘅消費。所以，如果咁啱出發嗰日機場有示威而上唔到機，或者咁啱返嚟班機取消咗因而滯留外地，係較有機會得到賠償。不過要留意，保險公司一般會寫明係賠償「合理支出」，唔好諗住好大筆數。

旅遊保單上亦有「更改行程」一項保障，因為有延誤而可能導致更改行程，就有機會引致額外交通和住宿費用，同樣都係要合理支出。總之記得保留所有相關單據同航空公司發出嘅延誤證明同登機證，先可以向保險公司索償。

至於跟旅行團嘅保障又如何？都係嗰句，一定要睇番條款，旅行社一般有指定合作保險公司，跟團最好自己先去了解保障範圍同賠償金額，有咩唔清楚就問返旅行社。如果覺得保障唔夠好，就最好自己另外再買多份旅遊保險打底。

另外，阿七聽過一啲朋友話旅遊保好容易買，臨飛前先喺ATM櫃員機買。阿七都要提醒番大家絕對唔好咁做！最好喺確定行程之後，就盡早買埋旅遊保險。點解？旅遊保其中一個不保事項係「在申請保險時或之前已經存在或宣佈或為公眾所知的任何事件或情況」，即係話，新聞都講咗過兩日有好大機會打風，你仲等到last minute先去買旅遊保險，到時真係打起風上嚟，保險公司好大機會拒賠與颱風相關所引起嘅賠償。咁你越遲起保，咪越大機會出現已公佈嘅消息囉，於是就多咗不保事項。

好彩身邊朋友都只係好奇咁問一問，今次冇人真係因為事件而令到行程受阻，同阿七一樣，今個暑假去同小朋友玩得開開心心，暫時放低種種煩憂。

作者：小胖阿七
　　　本地保險業界先驅，40年前入行的首批從業員，見證無數高低起落，由高峰期的月入20萬的中環人，到突然要由零開始call單儲客，唔介意分享經驗，最緊要你哋聽完有錢落袋。