親子新聞︱港媽發文稱替子女請假避寒　網民議論紛紛：請假太誇張！

寒冷天氣持續，是早起上班上學的起床大考驗。天文台今日（23日）表示，強烈冬季季候風正為廣東帶來嚴寒的天氣，本港今早市區氣溫下降至6度左右，新界再低兩三度。有港媽在討論區發帖文表示，替就讀幼稚園的孩子請假一天，帖文引起一眾網民議論紛紛。

天文台早已預告今個星期氣溫急降，一名港媽在facebook群組「巴打絲打『13親子育兒』Facebook Club」發帖文表示，「天氣預報當區明朝早2度。本人已經請假」，並詢問「各位家長聽日會唔會幫幼稚園小朋友請假？」

網民議論紛紛　指請假太誇張

帖文引起大批家長和網民討論，有家長表示「其實著夠衫就無問題啦！」大批網民留言︰「使唔使呀，著多啲衫就夠啦，室內有幾凍？」、「外國天氣零下七八度咪又係咁返學」、「咁英國加拿大日本每年咪要停學半年」；但亦有家長認為如果太凍，N班考慮返少一兩日沒有問題。另外有網民批評這是「射波」（無故缺課）行為，「射波當一項成就」、「正，細細過已教識佢地射波」等。

有家長建議衡量孩子身體狀況

然而，有家長表示自己都有替孩子請假，甚至想請夠2日。亦有家長稱孩子病左未好返，以免又再生病而幫孩子請假。「原來唔係淨係得我一個咁做，我聽日會請假，聽日8點元朗得5度，加上又落雨，有機會連請兩日」、「反正我都請咗，每個小朋友身體情況唔同，自己小朋友自己衡量啦，一日半日，請假一日唔係咩大事」。