【珍寶豬欄】你唔識講唔該？

佢：「我睇呀。」

我：「係咪未睇過？」

佢：「未呀」

我：「麻煩你俾身分證我登記呀」

佢：「身分證係好private嘅嘢嚟㗎喎，by the way你問人拎嘢唔識講唔該？」

⋯我好明白大部分媽媽湊住bb會特別敏感嘅。

我：「如果你要病假紙或收據就必須要身分證明文件做咗登記先嘅，如果你兩樣都唔需要就可以唔駛，咁你要唔要假紙或收據啊？」

佢：「我已經講第二次，問人拎嘢係要講唔該」

我雖然搵唔到頭先句對白應該喺邊插個唔該入去，不過禮多人不怪嘛，所以⋯

我：「唔該呢位小姐，唔該我想問你，需唔需要收據或假紙呢唔該？」

佢真的病了，居然對住句咁多唔該嘅對白露出滿意表情：「兩樣都要」

我：「咁麻煩你俾身分證我做登記啦」

佢：「唔～該～」

妖你，一時唔記得啫，唔好要我罰抄咁款啦，唔該。

我：「唔該你，身分證呀唔該」

佢：「我已經講第二次，身分證係好private嘅嘢嚟。」

般若波羅蜜！

月光寶盒又岀動啦？又帶我返轉頭呀？

我苦笑了：「你咁樣⋯我好難同你登記㗎喎？」

佢：「你知唔知我係邊個？」

我：「唔知」

佢：「i know who am i！」

我：「⋯⋯」

佢：「我知我自己係邊個就ok啦」

我：「⋯⋯」

佢：「我講俾你知就ok啦」

我：「假紙同收據⋯必須⋯」

佢：「身分證係好private嘅嘢嚟！」

我：「咁我點登記⋯你要假紙同收據⋯」

佢：「身分證係好private嘅嘢嚟，姑娘你明唔明呀？」

悟空，你即管捅死我啦，生又何哀，死又何苦，等你明白咗捨生取義，你自然會返嚟我唱呢首歌㗎啦！喃嘸阿彌陀佛～喃嘸阿彌陀佛～喃嘸阿彌陀佛⋯