【甘寧老師】現代男女文學

圖片：Laurent Bosch

有人話男人係理性，女人係感性。我係完全認同，因為你好難係一個理性嘅人身上賺取利潤同認同，但從感性嘅人身上就可以。

你Sell一個男仔買四五十蚊雞蛋仔雪糕，佢會話你低能，我買一底雞蛋仔加個M記雪糕都唔洗三十蚊；你Sell一個女仔，佢可能會好興奮咁答你覺得好新奇，好想試下。

同埋，文學上大家都捉準呢個心態，一班愛情散文專家每日無病呻吟，用感性文字重新演繹現代愛情觀。

「他不是不喜歡你，只是覺得自己配不上你。」、「相處越久越生疏，只是你們沒有真心相愛的借口。」、「愛你的人怎會連回你信息的時間都沒有。」

短短幾句似是而非，睇完都唔知自己睇緊乜嘅句子，往往會引來一群係愛情路上飽受挫敗嘅情聖們留言表示認同，有信徒於深夜時份睇見呢d咁催淚高深嘅文章，情難自禁打擾理應在熟睡嘅伴侶。

「竟然唔回我Whatsapp，係咪唔愛我啦....」

如果話Ocamp係情侶之間嘅惡夢，咁愛情散文就一定係情侶之間嘅慢性毒藥。幾多對相安無事嘅情侶，其中一方不幸染毒，另一方就要更加用心咁滿足佢，照顧佢，當佢地病入膏肓之時，就唯數到三，就放手。

圖片：facebook man9secret

當然以上所講嘅愛情文學大多數讀者都係女性，而文章角度都係以女性為出發點，令一眾本地男士相當不屑！呢班睇唔過眼嘅「巴打」更加開左個Page嚟大反擊，以男性角度諷刺呢類文章，相當搞笑。

不過其實自從出現「港男」、「港女」兩隻字之後，男女之間嘅價值觀分歧越來越大，導致本地男女之間嘅仇恨值不斷上升！而我認為呢類網絡戰爭絕對係好事，等兩者之間嘅價值觀得以交流發洩，重點係！食，下，花，生，又，幾，過，隱！