【甘寧老師】失去意義的功課

首先我地要明白功課嘅意義在於d咩，對於學生嚟講當然係溫故知新，馬上運用當日學到嘅知識去解答同應用係功課嘅問題之上；對老師嚟講功課正正就係反映呢位同學嘅掌握程度，細心同有經驗嘅老師更加可以從小朋友嘅錯誤中，睇到小朋友嘅思路係咩位出錯，從而幫佢地改善。

反觀現今情況，「功課」二字之所以會變成負面字詞皆因量多，苦了小朋友同時亦苦了家長，量多除左小朋友要用更多時間去做功課，家長用更多時間檢查同輔導之餘，仲會令小朋友對學習萌生出厭惡之情，對往後學任何野都百害而無一利。

除左「量多」之外，以我個人親身體會嚟講，最討厭嘅係，你明知道份功課做嚟冇任何得著，但仍然逼住要完成。

就好似你飲完支水將個樽扔落垃圾筒到，之後又執返個樽出嚟扔落第二個垃圾筒到咁！姐係點？咪就係「做嚟唔知為乜」囉！

我讀中學果陣最討厭嘅一定係謄文，我辛辛苦苦作左千幾二千字，即使反覆檢查，當中難免有一兩個小錯字，但往往就係呢幾隻你檢查唔到嘅漏網之魚，累我要抄返自己果千幾二千字（我好肯定我呢篇文都有錯字），當然你可以話謄文嘅作用咪係咁囉，唔想抄咪做到零錯字，但我唔認為呢種方法係鼓勵學習，發現錯處理應係諗方法等同學記住自己錯乜野同點解錯，而唔係話你做錯就有咁嘅下場，下次自己小心d。幸好我遇上一位好中文老師，係高中嘅時候幫我地爭取取消全文抄寫謄改，只需要將錯別字係文章側邊抄寫回正字即可，簡單省時有針對性咁解決問題。

功課當然有助鞏固上堂學到嘅知識，但普遍嚟講我認為香港有唔少功課係過度重覆。係數學功課上尤其明顯，例如你識計「2+3=5」、「4+7=11」等類似題目，你已經知道所有單位數加單位數都已經難你唔到，

即使做多一百條都唔會有任何進步，只會100條都正確！數學就係一樣咁神奇嘅科目，一理通真係百理明，所以做得多不如搞清思維。

總括而言，其實想減低現時學童壓力，最有效同最快捷嘅方法一定係反思功課內容同數量，唔好再做徒勞無功，費時又冇幫助嘅功課。做到重質不重量總好過現時部分學校低質而多量，功課失去應有意義！

圖片：mattdixon1991