【甘寧老師】教育局三戰家長底線

第一戰：強推小三復考TSA 扭曲民意

自從有咗TSA之後，小朋友嘅功課更多更難，題型仲貼近TSA一樣咁千奇百趣！個個都話無針對TSA操練，但實際只係玩文字遊戲，改頭換面去包裝課後補課，TSA題目就融入日常家課。嗯......又真係冇操練嘅！

至於TSA有咩問題，口臭都要再講多次，就係完全唔清晰得嚟嘅數據會點運用！如果真係做到原意咁，用得嚟數據幫助改善全港學校教與學，咁點解釋學校會咁緊張去加操？雖然教育局從未講過TSA成績同學校Banding有關係，但種種跡象實在令人難以信服。

第二戰：扭曲民意　落井下石

係家長反對聲音一浪接一浪嘅攻勢之下，局長終於肯同家長聯盟會面，整個會面過程佢地立場都堅定不移咁反對全面復考小三TSA，但報導出到嚟唔單止隻字不提家長反對聲音，仲唔知係邊到彈咗個「18區家教會聯會」出嚟代表全港家長支持復考。

事後局長不單止冇為騎劫民意道一句歉，仲係會議中落井下石整句「家長唔滿意TSA大可唔操練同轉校！」，根據局長精密嘅邏輯，我地香港市民「買唔到樓大可以唔住」；打工仔「唔想加班大可以辭職」！原來我哋個社會一D問題都冇。

仲亂嗡？成個香港教育界都比你「彎」曬啦。

第三戰：初中擬增15小時基本法課程

嗱嗱嗱，呢樣就玩得太過份啦！基本法嘅嘢你地係識嘅就唔洗成日去「人大釋法」啦，你地班大人自己都未識就咪搞班o靚仔啦，雖然三年讀15粒鍾好似好少時間，但係又冇用又疑似係另類「國民教育」嘅嘢，重要係全港市民都對教育局失去信心嘅情況下先嚟搞呢味嘢！我怕下次發起大型遊行示威嘅唔係一班廢青，而係一班莘莘學子嘅家長。

圖片：網絡