【甘寧老師】返工最忟分分鐘係搭地鐵

圖片：Kelly

本人對搭地鐵呢個行為係異常地反感，以我住屯門返葵興為例，搭地鐵來回就差唔多要40蚊，比搭巴士來回足足貴接近一倍！仲未計我搭巴士有得坐足全程，唔塞嘅情況下時間亦差唔多，但鬼叫遲到就係遲到！你同老細講塞車啊交通意外都多鬼餘，換嚟嘅只係「咁咪早d出門口搭早一班車」、「唔可以搭地鐵?」等無敵答案，每次聽到一半我就已經諗，其實我仲可以拎個帳篷住係公司添，Sorry係我諗得唔夠周詳。

而好多時遲到，都要比個原因同證據出嚟，但交通意外同路面擠塞嘅報導往往都唔係咁即時，擠塞嘅報導更加少之又少；相反地鐵無論壞車定延誤都實有報導，基於以上原因，令我開始咗搭地鐵返工嘅日子，

雖然時間係容易預算好多，但我每一日返工心情都係差到極點，除左有時逼到無扶手，單靠腳力撐幾個站之外，主要都係都係因為以下幾類人所致：

1.無論返工定收工，我總會遇到「攝位人」，呢種人嘅可怕之處在於只要你同前一位等候上車嘅乘客有些少空隙，佢就會企圖攝入去。當然我個人係遇強愈強，唯有收窄同前面乘客嘅距離試圖令佢放棄，但呢個時候唔好以為雨過天晴，佢地會係你隔離企到好埋好埋。果種無形嘅壓逼感真係令人想大巴大巴車落去，叫佢企開d！

2.贏在起跑線呢個思想對部分人嚟講已經係根深柢固，係轉車站就尤其顯現得到！太子、金鐘就一定多人落車架啦，有種人永遠都唔可以安份守己咁等到站，車廂已經逼到人貼人，佢地一於少理，未到站就一味「唔該借借、唔該借借」，幾經辛苦逼到出閘口準備搶出，門一開就保特上身，唔講我以為有金執。

3.返工時間好多時地鐵到站果陣都好驚已經爆人又要等下一班車，雖然明白大家都唔想人貼人咁企，但有d行為擺到明係自私！車廂入面成堆位永遠無人肯行入去，塞曬係門口搞到其他人想上都上唔到，其實我唔介意企入面d位，但可唔可以比我上咗車先。

如果你每日返工都見到身邊同事黑口黑面，唔洗問阿貴，佢九成同你一樣係搭地鐵返工。雖然係唔高興，但

最少你準時咗，至於值唔值！有得你揀咩？