【重整思維】不要做「小大人」

嘈吵要控制而不是禁止

有兄弟姊姊嘅小朋友，搭車果陣玩到癲曬又大聲；或者獨生子女不停講嘢，為求父母注意都係正常行為，不過好多家長就會馬上惡言相向，叫佢地收聲，再嘈就點點點。無論十聲叫囂定係兄弟之間玩到忘我，家長嘅角色係教育佢地唔好影響到其他人，而唔係一言堂禁止佢地違發天性咁一言不發先叫做乖仔/乖女。

禁止問長問短

小朋友唔係大人，有咩問題都會自己解決，所以唔洗下下出聲問人。明白有時小朋友d問題係好天馬行空，又無厘頭咁，佢地越問家長就越忟！就算家長答唔到佢地問題，最起碼都要陪佢地，幫佢地一齊去搵出答案，唔好比自己情緒影響，為求快快了事而敷衍小朋友，「唔識啊，唔好再問我嘢」，咁第時小朋友功課唔識，佢地都會好自然地「唔識啊，唔好再問我點解唔識」！

破壞單純直接諗法

大人每做一件事都會思前想後，考量一籃子因素先去做，但小朋友嘅行為動機都非常直接，你將佢地當成「小大人」咁教，唔單止成效低，仲會激嬲埋自己。

例如小朋友唔食某樣嘢，好多時都係好簡單，就係因為「唔好食」，你同佢講非洲d小朋友點慘點慘，佢地根本唔會在意，你又當正自己解釋咗小朋友唔聽咁，咪激親自己；就算佢最後聽你講，食曬D嘢，都唔係因為佢體諒非洲兒童，而係因為比面媽咪溫柔氹佢食嘅聲線。

好多時家長話小朋友難教，係因為唔係對症下藥，小朋友角度聽家長解釋，好多時都係「關我咩事」，趁小朋友仲單純，就用單純嘅方法解決，唔洗太急於灌輸背後考慮嘅因素比佢地聽，佢地遲早會學識。