【欲哭無淚】只有人奶媽才懂的心情

其實一直以來都覺得吊住兩個樽咁泵奶好有危機，不過，當無事發生時就當然唔會理會，直至上兩星期泵泵吓，「撻」一聲，個樽同個喇叭突然分離，儲奶樽就此墮地，幾十毫升滴滴珍貴嘅奶就咁就一地都係。事已至此，我只有快快手拎紙巾、地拖清潔好，並且同自己講以後一定要更加小心。

一地都係真係欲哭無淚呀！

誰不知隔咗幾日無返工，今日一返工當然又如常泵奶，否則阿仔邊有奶飲。身為窮媽媽的小編，平日隔4、5個鐘泵合共約130-150ml左右，今日碰巧早上外出工作，隔了7、8個鐘先泵，諗住泵到180ml，夠阿仔食有餘。點知接近尾聲時，又「撻」一聲，心中大叫「媽呀！又倒奶呀！」，今次應該倒了近80ml……

上次手快快抹咗，沒有拍照跟大家分享，今次再倒當然心仍在痛，但都快快拿出相機影底，有圖有真相！真係倒到連褲都濕埋呀！一路打呢一篇分享文，個心都仲一路揼緊，「點解我又倒瀉奶？點解又係我？」影完相又唯有乖乖地抹返個地，然後繼續打稿啦！

我發誓唔可以再倒奶！！！各位人奶媽明唔明我有幾傷心？