【拆解原因】點解BB有頭泥？

脂溢性皮膚炎又稱頭泥，好多BB出生後兩至三星期就會出現頭泥，黃色一大片，好似頭皮屑，天氣乾燥更加容易甩皮，嚴重嘅仲會有一陣「酸餿」嘅臭味。更有啲媽咪會忍唔住刮、搣、捽BB頭皮，但咁樣好容易弄傷BB頭皮流血！究竟頭泥點解會形成？要點樣處理好？

頭泥形成
因為BB皮膚新陳代謝迅速比死皮脫落嘅速度快，而且BB油脂腺較大和分泌較旺盛，令頭皮容易出現微紅、油膩嘅小薄片或黃色嘅鱗屑，呢啲就是頭泥。

而頭泥唔只出現頭上，原來面、眼眉同耳邊緣位置都會有，媽咪幫BB沖涼嘅時候要特別小心留意。

處理方法

其實「頭泥」係正常現象，唔係BB頭皮太污糟或者清潔不夠，所以唔需要特別去做治療，但如果家長擔心的話，都可以用清水替BB清潔皮膚，但如果頭泥太厚，可以用橄欖油或BB油塗抹於頭泥上，軟化後用BB洗頭水清潔，再用梳清理黏著頭髮上嘅頭泥。

不過如果情況太過嚴重嘅話，例如頭皮紅腫發炎，當然要及時找醫生處理。