【珍寶豬欄】等到初五就有得睇㗎啦！

一年三百六十五日裡面，醫生只休新年嗰幾日係咪真係咁天理不容…

我：「我哋初五開㗎啦，如果冇其他問題，我收線㗎啦先生」
佢：「我未講完呀！」
我：「請問仲有咩問題呢？」
佢：「點解唔開呀？香港幾百萬人都需要醫生，醫生點可以話唔開就唔開？」
哇，幾百萬人輪一個醫生，醫生爛硬啦喎…
我：「醫生都需要休息嘅。」
佢：「我唔駛呀？」
我：「我相信都會有其他診所係應診嘅…」
佢：「我問咗幾間㗎啦！你哋個個都懶到西！」
我突然好想同你問過嗰幾間嘅姑娘擁抱，之後一齊打爆你。

我：「俾心機再問多幾間～新年期間係比較少診所應診。」
佢：「我唔問啦！我受夠㗎啦！同我約初二！」
我：「先生，我哋初二休息，亦唔接受電話預約～我哋平時都係當日親自嚟登記排隊㗎～」
佢：「我初二嚟登記囉！」
我：「我哋初二休息，初五先開～」
佢：「我唔信我嚟到喺門口等，你哋唔開門！」
好哋哋做咩唔信人喎～我喺屋企啪緊原個年糕，你就慢慢喺門口食風～肚餓記得擘大啲個口呀，可能會有塊枯葉飄入口㗎～
佢：「我初二嚟呀！」

嘟。
佢狠心地收咗我線。
你慢慢等啦～等到初五就有得睇㗎啦～