【葉偉麟專欄】總會等到開花的一天

有時只針對表面行為處理，未必是最佳根治的辦法，反而了解背後的動機，才能對症下藥。

這個男孩在治療室裏面，經常保持沉默。

有次他利用一些玩具，放進沙盤內，向我細說出他內心的故事。呈現在眼前的我畫面，其實都是他心中的潛意識。

男孩：「今日係Halloween, D骷髗骨頭同南瓜鬼大王飛晒出嚟，問人攞糖食！」

我：「原來係咁，咁佢哋最鍾意食咩糖？」

男孩：「朱古力，仲要係酒心朱古力！」

我：「咁佢哋成唔成功呀？」

男孩： 「全部食朱古力食到醉醺醺，跟住我就將佢哋捉晒去鬼監獄! 坐監坐到死！死完翻生再繼續坐過！」

這個男孩覺得，弟弟的出生，就彷彿是Halloween 的鬼一様，直接衝着自己來，目的是來搶走原本屬於自己「生活上的糖果」，覺得很痛苦，於是欺負弟弟，但同時又受父母鎮壓，結果才會在學校打人。

我問家長：「小朋友明顯缺乏安全感，在家裏的親子關係如何呢？」

家長：「每日我會特登接送佢返學，lunch 中間又會同佢Skype傾吓計，一年帶佢去四次旅行，都算係咁啦，重點會缺乏安全感?」

我：「親子關係，係需要經營並唔係與生俱來嘅。你刻意安排，的確做得非常好。但可惜，親子關係，係重質唔重量嘅。
其次，無論你做咗幾多嘢，只要孩子覺得仍然唔夠，呢個先係事實。係一份感覺，並唔係你覺得自己好唔好，出發點係取決於孩子嘅角度。」

家長：「香港地搵食有乜計，我咁努力工作，都係想比最好嘅嘢佢，等佢讀名校，再學返三兩門絕技，等佢一大個乜都唔怕，靠自己搵到食啫。」

我：「如果希望小孩真正健康成長，需要並非是啲乜嘢嬴在起跑線教育，反而是要一段看不見摸不到，但最能感受到的安全依附關係。咁佢哋先學到Learning to learn。」

父母與子女之間，努力建立安全依附關係，才是最有效終身教育，這是最必須集中火力投放精力的地方。孩子需要的是「引導」，並非「教導」。我們只要在旁邊繼續施肥，除草，澆水，曬太陽，總會等到開花的一天。

最後一節治療，這個男孩，為我送上一顆自製酒心朱古力說：「唔好食到醉咗啊。」

我：「多謝你，我而家已經有D醉嘞！哈哈」