【珍寶豬欄】細路玩得，我唔可以玩！？

佢：「仲有個問題，有冇得寫證明㗎‧」
我：「你想寫啲咩證明呀？」
佢：「你哋出面個公園嗰張搖搖櫈整到我呀，我條腰好痛呀。」
我一頭霧水：「出面個公園？搖搖櫈？」
佢：「呢～動物樣，坐上去可以向前向後搖嗰啲。」
我：「係呀，我大概知你講邊啲，你點整親呀？俾佢整親條腰？」
我想像唔到個畫面…唔通….
佢：「我玩玩吓佢突然向後跌囉。」
並唔係突然啊，小姐，你知唔知嗰啲係小朋友玩㗎？小朋友幾重，你幾重呀？俾你坐一坐搖兩搖，根都斷好正常呀！
我：「啊..咁你想寫張紙交俾公司？」
佢：「梗係唔係啦，我都唔駛返工嘅，俾管理處㗎！」
我：「吓？你諗住投訴呀？」
佢：「係呀，唔得咩？而家你哋個公園啲嘢爛喎，整到我喎！」
我：「但係嗰啲本身係俾小朋友玩㗎喎？不過你都可以入去問吓醫生寫唔寫到嘅...」
佢：「咩意思呀你？細路玩得，我唔可以玩㗎咩？」
我：「小朋友同成人個體重唔同嘛。」
佢：「我都係著中童衫㗎咋！」
啊！唔怪得你件衫就爆咁啦，我仲喺度諗緊你做咩要虐待自己啲肉～我以為你鍾意玩綑綁咋～
佢：「身分證呀，登記啦，我病人嚟㗎！」

嗯，你真係好病，病到自己就快十八對都仲覺得自己係小朋友。

（以上專欄由Dr-Max教材大王全力支持）