2020-10-20, 週二

【親子熱話】復課返半日爸媽讚好 呻全日制攰到爆

【親子熱話】復課返半日爸媽讚好 呻全日制攰到爆

小學生經歷過4個多月的停課終在6月復課,每日只需返半日。近日在家長群組和討論區,爸媽認為半日制讓孩子有更多時間做功課、溫書、休息和玩樂,對身心發展有利,帖文引起不少家長共鳴。

 

香港學生可說是「繁忙兒童」,忙返學,放學後就忙上補習班、興趣班,回家後仍要應付功課和溫習,休息和玩樂時間少之又少。復課後的半日上課安排讓小朋友有更多時間休息和做功課,不少家長都懷念以前半日制的美好時光,指「以前放學返屋企做完功課,睇ETV(教育電視)幾開心」。

 

政府約20年前開始推行小學全日制,目的是紓緩緊逼的上課時間,使學校能更靈活編排課程;可以提供較充裕的時間,加強師生的溝通以及使學生得到較全面的照顧等。但家長認為學校實際運作已變質,家長和學生變得愈來愈忙,一齊睇睇以下網民家長留言,可能同樣是家長心聲。

20200618 11606 k02

 

「之前小朋友放學返嚟話好眼瞓啦,又話好攰啦咁樣,做得功課,又要溫書,跟住就要食飯訓覺,都冇時間玩,好慘。而家起碼多一兩個鐘頭出去公園玩吓都好呀,所以我絕對支持返半日學。」

 

「我每日返來睇功課、溫習,個仔其實好攰。今星期返半日,做功課都做得好啲,大人都要work life balance,細路都要study-life balance。」

 

「下午喺學校一定上功課輔導班,成4點先返到屋企,仲一堆功課、仲要溫書,真係好恐怖。」

 

「好似而家咁半日都幾爽,就算去補習社,最遲3點半至4點返屋企可以睇吓電視。」

 

「全日又要趕功課、沖涼、食飯,少少親子時間都無。」

 

「一做完功課,又要做網上,做完又溫默書。」

 

「佢哋放學3點半即去補習班到6點,未計其他興趣班,星期一至五唔得閒又排落去星期六,佢哋係咪真有休息呢?」

 

「其實佢哋都幾辛苦,一啲自己時間都冇。」

 

「連阿媽都輕鬆咗。」

 

「小學生根本唔適合返全日制。幾歲人仔就開始朝8午4,返學、補習、溫書、做功課嘅生活,真係人都癲!簡直扼殺小朋友嘅童年!」

 

以上網民的留言是否家長心聲?學業不是小朋友生活的全部,有個快樂童年也很重要。