【俊傑新世代】電子支付衝擊兒童理財觀

仲尼：是咁的，話說我每日都會經過幾部汽水機，最近有一次見到幾個6、7歲學生哥圍埋一齊，原來其中一個話請大家飲嘢，好豪爽咁不斷為其他小朋友「嘟」嘢飲，仲同佢哋講「唔使錢㗎」，鍾意就嘟多兩罐攞返屋企啦。作為爸爸，我都即時諗起，到底我個仔大個之後，會有點樣嘅理財觀念呢？

Prof J：明白晒！隨住八達通呢啲具備近場通訊功能(NFC) 嘅支付方式興起，的確係扭曲咗一啲小朋友嘅理財價值觀；甚至近年愈來愈多人用嘅手機支付方式如Apple Pay、Android Pay、WeChat Pay同支付寶等，就令下一代對金錢嘅概念更加模糊。例如之前曾經有爸爸喺小朋友部手機安裝Android Pay，並連結自己嘅信用卡戶口，諗住畀小朋友有起事用嚟應急，點知小朋友就用咗嚟購買打機「點數」，到爸爸喺月尾收到「震撼帳單」先知發生乜嘢事。

仲尼：無錯，科技的確帶嚟好多方便，但同時「無現金化」呢樣嘢，亦可能會衝擊我哋同下一代用錢嘅方式，變得更加「先使未來錢」。

Prof J：咁你覺得作為家長，可以點樣改善小朋友嘅理財概念呢？

仲尼：首先，我覺得如果小朋友年紀太細，就唔好幫佢安裝手機支付功能啦；其次就係，除咗坐車呢啲需要用到八達通嘅支付方式之外，喺小朋友其他有機會用錢嘅時間，例如買玩具、買零食或文具時，都應該盡量用返現金，至少令佢哋知道「錢係咩嘢」，家長喺佢哋畀錢時，最好從旁指導，例如小朋友有50蚊，當買支筆用咗5蚊，即係剩返係幾多錢呢？用咗嘅金錢比例又係幾多呢？剩返嘅錢又夠買乜嘢呢？喺消費同時，順道灌輸金錢概念。

Prof J：其實家長最擔心都係小朋友習慣亂咁用錢，但係如果你畀咗張八達通小朋友，亦難保佢哋用嚟搭車之外，唔會用嚟亂買嘢㗎噃，因為「嘟嘟吓」唔多覺㗎嘛。

仲尼：所以家長應該下載查詢八達通餘額嘅手機App，留意小朋友有冇亂用八達通消費，而畀佢哋用嘅八達通，就唔好設為自動增值，而係畀現金佢哋，因應佢哋需要用嘅金額，定期陪埋一齊增值。

Prof J：咁你仲有咩嘢理財教育建議畀家長？

仲尼：當然就係開返個戶口畀小朋友啦，我囝囝雖然只得3歲，但我都已經開咗戶口，用嚟儲住佢逗到嘅利是錢，再加咗少少「種子基金」入去，打算等佢儲多兩三年利是錢之後，先至畀佢知道自己有呢一筆積蓄。另外，我打算第時要畀零用錢囝囝嘅時候，諗一啲誘因令佢可以唔好用晒啲錢，例如同佢搞個「獎賞計劃」，當佢每星期能夠有錢剩，我就畀一個印花佢，儲滿十個印花，就能夠換領一啲奬賞，例如係「零用錢出Bonus」，或者係佢心愛嘅玩具，希望令佢養成儲蓄習慣。

Prof J：估唔到你將超市儲印花呢招應用到親子理財！掂呀兄弟！

作者: