【鍾意講大話】4招對付兒童病態說謊

近日有位媽媽於網上討論區求助，事源係佢發現自己個7歲仔好鍾意講大話，連無關痛癢嘅事都會講大話，甚至乎自己屈自己，呃媽媽預默成績唔好，所以扔咗本預默簿。但媽媽打電話詢問學校先知，老師根本無派預默簿畀佢拎返屋企，而且仔仔默書成績事實上仲要係唔錯！

媽媽就問仔仔點解咁做？仔仔就答話係驚媽媽同埋覺得可以挑戰佢，亦表示點都唔會改，仲話媽媽睇多啲偵探書學習下破案技巧就可以知佢講大話。媽媽好無奈話外人唔了解，可能會覺得佢好懂事，但事實佢係轉緊個腦諗住點討好你打發你，完全無佢辦法。

好多網民都表示自己仔女都有此類問題，部份網民就總結咗一啲心得比各位媽媽，以下有幾個建議，大家一齊睇睇：

令小朋友明白父母愛佢哋

平日比多啲自由空間小朋友，經常告訴小朋友你愛佢，令佢哋信任父母。就算小朋友做錯事，父母要罰要鬧，之後都要解釋佢聽點解要咁做，比佢知道所有事都係從佢嘅角度出發，係為佢好。久而久之，小朋友會知向父母坦白，佢哋係會幫你而唔係傷害你。

適當空間同鼓勵

唔好比太大壓力小朋友，令佢哋無動機去欺騙你。小朋友會欺騙大人，好大機會係因為知道自己做咗家長唔鍾意嘅事，又知家長會嬲同罰佢，呢個時候如果家長比嘅精神壓力越大，小朋友就愈有可能講大話。

加強與校方、家長的溝通

多啲同學校同其他同學家長溝通，了解下自己小朋友喺學校嘅情況，同時可以知道學校嘅行程表，令小朋友無咁易有機會講大話之餘，又可以了解小朋友多一啲。

多解小朋友

家長日常應該同小朋友要保持良好溝通，發現小朋友講大話，就應該同佢哋做一個深入嘅溝通，從而設定合適方法引導佢哋戒除壞習慣。另外亦要令小朋友明白講大話嘅壞影響，例如當習慣講大話後，家長同朋友仔以後都無法再相信佢，繼續落去大家會對佢好失望。

1. 其實最中心思想都係要溝通，最重要唔好令小朋友驚你，小朋友願意聽你講，事情就會容易好多。