【寶寶夜未眠】5招令BB晚間睡眠更有規律

對於新手爸媽而言，照顧BB其中一樣最頭痛嘅事，應該就係夜晚瞓覺﹗唔知點解BB越夜越精神，搞到大人都無覺好瞓…遇到以上情況，父母可嘗試幫助BB建立睡眠規律，等佢地喺晚上瞓得冧啲、熟睡啲，咁大人都有機會休息得好啲啦！

日頭消耗多啲精力

初生BB一日中大部份時間都瞓覺，但家長可以係佢清醒時多啲同佢交流，鼓勵佢做吓一啲活動，同佢玩下，咁樣BB夜晚就會瞓得更好喇。

建立合理睡眠時間

由於新生BB需要餵夜奶，所以媽媽應該根據BB年紀同瞓覺時間，以設定有規律嘅作息時間。而媽媽應該要盡量令BB固定係呢個時間就寢，唔好經常提早或延遲。

營造放鬆睡眠環境

BB需要時間嚟培養睡意，所以在瞓前一個鐘，可以將燈光調暗並遠離嘈音，令BB的意識同身體可以漸漸放鬆。另外舒適嘅室內溫度都好重要，建議最佳溫度約15.6度至23.9度。

偶爾用奶嘴作安撫

如果遇上BB難以入睡嘅時候，媽媽可以俾個奶嘴佢試吓。

睡前停止刺激活動

就好似大人一樣，BB在瞓前如果情緒起伏太大(尤其係太興奮)，都會無辦法即時瞓著﹗所以在準備睡覺前，就盡量減少刺激BB的行為(例如同佢地玩)，等佢地可以快啲入睡。 

最後，大家盡量都唔好同BB一齊瞓，始終嬰兒同大人同床睡覺會有一定的風險呢﹗