【BB改名煩惱 】你的名字!

吳呢個姓，廣東話黎講本身係一個反面否定詞就等於ＮＯ，如果改個名就正面詞都會變成負面。例：吳開心，吳成功。你以為負負得正就得咩? 咁你就天真過天真嬌啦，例：吳失敗，當你叫佢個名時一樣輸，失敗過黎玩玩啦。

所以姓吳改名時就要避開一啲有期許嘅名，如果唔係到小朋友返學就一定俾人拿黎玩。

姓吳的BB點改名?

由於姓吳真係好難改名，於是希望集思廣益，上社交媒體問朋友搞個改名比賽啦。已經講左唔好改吳廣德，吳好緹。其實出Feed前已經估到留言嘅名多數都係玩野多。

不出我所料真係玩野多，果啲吳錯、吳好、吳該都已經自動Skip左，膠都廢事俾。另外，有幾個名就咁睇落都唔錯嘅，好似：吳幗懿、吳采妮、吳敏芝，但其實暗藏殺機。呢三個名讀出黎就知咩事，唔覺意、唔彩你、唔Ｘ知。

最後搵左易經大師改名，囡囡最後叫做吳卓欣，大家覺得點？襯唔襯呢位小朋友呢？

作者:Davis Papa
新手爸爸養有一女，現職電視台導演及網路媒體創作人